Stepnogorsk qalalyq soty Aqmola oblysynyń aýmaǵynda jarylǵysh zattardy zańsyz satýmen ainalysqan qylmystyq top múshelerine qatysty úkim shyǵardy, dep habarlaidy "Ult aqparat" QR UQK baspasóz qyzmetine silteme jasap.
Qylmysty uiymdastyrǵan O.Golovliov pen N.Kabdýshev QR Qylmystyq Kodeksi 24-shi babynyń 3-shi tarmaǵy jáne 287-shi babynyń 3-tarmaǵymen kózdelgen qylmystar (qarý-jaraq, oq-dári jarylǵysh zattar men jarylǵysh qurylǵylardy zańsyz satyp alý, berý, satý, saqtaý, tasymaldaý jáne ózimen alyp júrý) boiynsha aiypty dep tanylyp, 3 jyl 2 aiǵa bas bostandyǵynan aiyrý jóninde úkim shyqty.
Esterińizge sala keteiik, 2019 jyldyń 20 qarashasynda Aqmola oblysy boiynsha UQK Departamentiniń qyzmetkerleri «Qazaqaltyn taý-ken metallýrgiialyq kontserni» aktsionerlik qoǵamynyń bólimshelerinen, ári qarai satyp paida tabý maqsatynda jarylǵysh zattardy urlaýǵa qatysy bar degen kúdikpen «Golovliov-Kabdýshev» qylmystyq tobynyń múshelerin ustaǵan bolatyn.
Bular 2019 jyldyń qazan-qarasha ailarynda salmaǵy 52 kg «Petrogen-P» jarylǵysh zaty men 60 dana «Iskra-Sh», «Korshýn-M DIN-Sh» elektrsiz jarǵysh quraldaryn satqan.
O.Golovliov pen N.Kabdýshevtiń turǵylyqty mekenderin tintý barysynda taǵy da 100 kilogramnan astam «Petrogen-P», 7,5 kilogramnan astam «Ammonit» jarylǵysh zattary, sondai-aq 382 dana kapsiýl-detonatorlar men tolqyndy-soqqy tútiksheleriniń kesindileri tabylǵan.
