Búgingi kúni Qazaqstannyń bilim berý júiesinde mektepterdi, kolledj ben ýniversitetterdi onlain bilim alý formatyna kóshirý boiynsha qyzý jumys atqarylýda. Koronavirýs karantinine bailanysty bilim berý sapasyn joǵaltpai qashyqtan bilim berý formatyna qysqa ýaqytta kóshý qajettiligi týyndady.Osy jaǵdaidy eskerip, Qazaqstan Respýblikasy Túńǵysh Prezidenti Qory men «Elbasy Akademiiasy» korporativti qory fpp.kz saitynda «Birge oqý» damytýshy pikirtalas alańyn iske qosýda. Bul týraly "Ult aqparat" Qordyń baspasóz qyzmetine silteme jasap habarlaidy.
Qazaqstandyqtardyń qashyqtan bilim alý formatyna kóshý barysy nátijeli jáne yńǵaily bolýy úshin «Birge oqý» jobasy muǵalimderge onlain bilim berýdiń qyr-syryn tanystyryp, jańa tehnologiialardy meńgerýge kómektesý, sondai-aq ata-analardyń qorqynyshyn seiiltip, daqpyrt týdyrmaý, jańa múmkindiktermen tanystyrý, balalarǵa sapaly bilim alýǵa múmkindik berý maqsatyn qoiyp otyr.
«Birge oqý» muǵalimderge onlain oqytýdyń jańa tehnologiialary men resýrstaryn, ata-analarǵa jańa múmkindikter týraly aqparat berip, týyndap otyrǵan ýaiymdaryn aldyn alýǵa, al balalar úshin sapaly onlain bilim alý joldaryn keńeitýge baǵyttalǵan joba.
«Birge oqý» jobasynyń negizgi baǵyttary birinshiden, mektep muǵalimderine, qosymsha jáne arnaiy bilim berý. Sondai-aq, ustazdar men ata-analarǵa arnalǵan pikirtalas alańynyń negizinde beriletin oqytý kýrsy aqysyz negizde júrgiziledi. Ekinshiden, Qazaqstanda jáne álemdegi onlain bilimdi engizý týraly jańalyqtarmen bólisý. Úshinshiden, onlain bilim alýdaǵy eń úzdik resýrstardyń tizimin usyný, sholýlar, avtorlyq baǵanalar.
Platforma muǵalimderge qashyqtan bilim berýdi qalai jáne neden bastaý kerektigin túsindiretin kómekshi jáne seriktes bola alady. Onlain bilim berýdiń negizgi quraldaryn, nusqaýlyq pen tehnikasyn kórsetip, túsinikti aityp beredi. Kýrs barysyndaǵy barlyq protsester messendjerler, www.fpp.kz saitynyń pikirtalas alańyndaǵy toptary men call-ortalyq arqyly keri bailanysty eskere uiymdastyrylady.
Alańdy qurý barysynda kóptegen jyldar boiy onlain-bilim berý salasynda jumys isteitin, bul oqytýdyń erekshelikteri men qaǵidalaryn biletin ozyq otandyq muǵalimderdiń tájiribesi eskerildi. Aýyldyq jerlerde onlain oqytýdy uiymdastyrý quraldaryn zertteýge erekshe kóńil bólinedi.
Qoldanýshylar úshin video jáne aýdio sabaqtar, konspektiler men jattyǵýlar usynylatyn bolady. Materialdar keri bailanys arqyly alynǵan usynystardy qosa alǵanda kúndelikti jańalanyp, tolyqtyrylady. Budan bólek platforma negizinde qoldanýshylardyń jeke kontentin jariialaý, arnaiy keńestermen bólisý, túrli baiqaýlar men saýalnamalarǵa qatysý múmkindigi kózdelgen.
Platformanyń áleýmettik jeli formatynda uiymdastyrylýy eń úzdik tájiribelermen tez arada bólisýge, onlain bilim alýdyń ózekti máselelerin talqylaýda, máselelerdiń sheshý joldaryn anyqtaýǵa múmkindik beredi.
Qoldanýshylarǵa yńǵaily bolý úshin Youtube, What’s App, Facebook, Instagram, Odnoklassniki, Telegram jelilerinde «Birge oqý» jobasynyń paraqshalary iske qosylǵan. Sondai aq 7170 nómiri arqyly sall ortalyqqa (qońyraý shalý tegin) habarlasýǵa bolady.
