QR Syrtqy ister ministrligi Shri-Lankadaǵy lańkestik aktilerge qatysty málimdeme jasady. Aldyn ala málimet boiynsha, Shri-Lankadaǵy jarylystan qaza tapqan jáne jaralanǵan azamattar arasynda qazaqstandyqtar joq.
«Qazaqstan 2019 jyly 21 sáýirde Shri-Lanka astanasy Kolomboda, sondai-aq Negombo jáne Battikaloa qalalarynda beibit adamdardyń ómirin qiǵan terroristik aktilerdi qatań túrde aiyptaidy», - dep jazylǵan QR SIM málimdemesinde.
Sonymen qatar onda Qazaqstan terrorizmniń barlyq túrin aiyptaityny jáne álemdik qoǵamdastyqtyń osy zulymdyqqa qarsy kúresinde ujymdyq ári batyl is-qimyldardy qabyldaýyn qoldaityny atap ótilgen.
«Osy adamgershilikke jat aktsiialardy uiymdastyrýshylar anyqtalyp, tiisti jazasyn alýy kerek dep sanaimyz. Lańkestik saldarynan qaza bolǵandardyń jaqyndaryna, Shri-Lanka halqy men Úkimetine qaiǵyryp kóńil aitamyz», - delingen ministrlik habarlamasynda.
Budan buryn habarlanǵandai, Qazaqstan Prezidenti Qasym-Jomart Toqaev Shri-Lankadaǵy jarylys kezinde qaza tapqandardyń jaqyndaryna kóńil aitty.
Sońǵy málimetter boiynsha Shri-Lankada segiz jarylys boldy. Sheteldik BAQ-tyń málimettinshe, qaza bolǵandardyń sany 180-nen asty, taǵy 500 adam zardap shekti.
Kóz jumǵandardyń arasynda shetel azamattary da bar.
