Reseidiń Qazaqstandaǵy elshisi Resei Syrtqy ister ministrliginiń resmi ókili Mariia Zaharovanyń daýly málimdemelerinen keiin QR Syrtqy ister ministrligine shaqyrylady. Bul týraly QR SIM resmi ókili Aibek Smadiiarov málimdedi, - dep habarlaidy Tengrinews.kz.
"Búgin Resei elshisi Qazaqstan SIM-ne áńgimelesý úshin shaqyrylady. Talqylanatyn basty taqyryp - Resei SIM resmi ókili Mariia Zaharovanyń málimdemesi. Sondai-aq, kún tártibinde Reseidiń Ýkraina jaǵyna qoiylatyn talaptary tur. Bul jalpy diplomatiialyq tájiribe. Mariia Zaharovanyń ýkrain elshisin Qazaqstannan shyǵarýǵa qatysty málimdemesi, bizdiń oiymyzsha, Qazaqstan men Reseidiń teń quqyly strategiialyq áriptester retindegi odaqtastyq qarym-qatynasyna dissonans týdyrady", - dedi Smadiiarov májilis aiasynda jýrnalisterdiń suraqtaryna jaýap bere otyryp.
Ol Zaharovanyń elshini qylmystyq jaýapkershilikke tartý týraly úndeýine qatysty pikir bildirdi.
"Resei Syrtqy ister ministrligi ókiliniń qandai qylmystyq jaýapkershilik týraly aityp otyrǵanyn biz túsinbedik, óitkeni Vena konventsiiasyna sáikes Qazaqstandaǵy Ýkraina elshisi diplomatiialyq immýnitetke ie", - dedi resmi ókil.
