Beijiń qysqy Olimpiadasy qarsańynda Qazaqstan sportshylary 50-ge jýyq litsenziialyq týrnirge qatysady. Bul jaiynda Senat depýtattarynyń saýalyna QR Mádeniet jáne sport vitse-ministri Nurqisa Dáýeshovtiń jaýabynda aitylǵan, dep habarlaidy QazAqparat.
«2021 jylǵy 2 qyrkúiekte Premer-Ministrdiń orynbasary E.Toǵjanovtyń tóraǵalyǵymen buqaralyq sportty damytý jáne Beijiń qalasynda (Qytai) ótetin 2022 jylǵy XXIV qysqy Olimpiada oiyndaryna daiyndyq máseleleri boiynsha múddeli memlekettik organdardyń, barlyq óńirler ákimderi orynbasarlarynyń, bas jattyqtyrýshylardyń, qysqy sport túrleri boiynsha federatsiialardyń, Ulttyq olimpiada komitetiniń qatysýymen keńeitilgen keńes ótti.
Onda, tiisinshe, qysqy sport túrlerin damytýdyń problemalyq máseleleri boiynsha hattamalyq tapsyrmalar berildi. Sondai-aq, qysqy sport túrleri boiynsha Qazaqstan Respýblikasynyń shtattyq qurama komandalary bas jattyqtyrýshylardyń jeke basshylyǵymen bekitilgen jeke daiyndyq josparlaryna sáikes qysqy Olimpiada oiyndaryna belsendi daiyndalýda», - delingen vitse-ministr jaýabynda.
Onyń dereginshe, 2020 jyldan bastap 2022 jylǵy qysqy Olimpiada oiyndaryna litsenziialardy jeńip alý boiynsha túrli álemdik litsenziialyq, reitingilik týrnirler ótkiziledi. Qazaqstandyq sportshylar, sondai-aq basqa elderdiń sportshylary da osy týrnirlerge qatysa otyryp, Olimpiada oiyndaryna qatysý úshin reitingilik upai jinaidy.
«Sońǵy litsenziialyq týrnir 2022 jyldyń qańtar aiynda ótedi. 2022 jylǵy qańtar aiynyń sońynda reitingilik týrnirlerdiń qorytyndylary shyǵarylyp, litsenziialardyń sany aiqyndalatyn bolady. Aita ketý kerek, Olimpiada oiyndarynyń aldynda sportshylarymyz 50-ge jýyq litsenziialyq týrnirge qatysýdy josparlap otyr. Qazaqstandyq sportshylar shańǵy jarysy, biatlon, konkimen júgirý sporty, short-trek, fristail-mogýl, fristail akrobatika jáne tuǵyrdan shańǵymen sekirý boiynsha irikteý jarystaryna qatysady», - dedi Nurqisa Dáýeshov.
