Qazaqstan Respýblikasy Syrtqy ister ministrligi Siriiada atysty doǵarý jónindegi ýaǵdalastyqtar týraly málimdeme jasady, - dep habarlaidy "Ult aqparat" QR SIM baspasóz qyzmetine silteme jasap.
"Siriia Arab Respýblikasynyń barlyq aýmaǵyndaǵy atysty doǵarý jáne úkimet pen qarýly oppozitsiianyń Resei Federatsiiasy men Túrkiia Respýblikasy kepilgerler bolyp shyǵatyn beibit kelissózderdi bastaýǵa ázirligi týraly ýaǵdalastyqtardy quptaimyz. "Siriia úkimeti men qarýly oppozitsiia arasyndaǵy atysty doǵarý týraly", "Atysty doǵarý rejimine baqylaý jónindegi sharalar kesheni týraly", "Siriialyq retteý jónindegi beibit kelissózderdi bastaýǵa ázirlik týraly" úsh qujatqa qol qoiylýy siriialyq daǵdarysty sheshý jónindegi is júzindegi áreketter úshin shynaiy negiz bolýǵa qabiletti dep sanaimyz", - delingen málimdemede.
Sonymen qatar, jospardy Birikken Ulttar Uiymy jáne Arab Memleketteri Ligasynyń arnaiy ókili Staffan de Mistýra men Siriiada urys áreketteriniń tezirek doǵarylýyna múddeli basqa taraptardyń qoldaǵany mańyzdy ekeni aitylady.
"Osyǵan bailanysty tiisti kelissózderdi Astanada ótkizýge Qazaqstan Prezidenti Nursultan Nazarbaevtyń jariia etken ázirligimizdi rastaimyz. Kelissózderdi ótkizý tek atysty doǵarý rejimin josparly túrde saqtaý jaǵdaiynda ǵana múmkin bolatynyn túsinemiz. Sońǵy ýaǵdalastyqtardyń Siriiadaǵy tolyqqandy saiasi úderisti BUU Qaýipsizdik Keńesiniń 2254 (2015) qararyna sáikes qaita jańǵyrtýǵa múmkindik beretinine senemiz", - deidi SIM ókilderi.
"Qazaqstan ári qarai da halyqaralyq qaýymdastyqtyń tiisti kúsh-jigerlerine, sonyń ishinde 2017 jyldyń 1 qańtarynan 2018 jyldyń 31 jeltoqsany aralyǵynda BUU Qaýipsizdik Keńesiniń turaqty emes múshesi retinde yqpal etýge ázir", - delingen málimdemede.
Tolyǵyraq: https://kaz.tengrinews.kz/kazakhstan_news/kr-sm-siriyada-atyistyi-dogaru-jonndeg-uagdalastyiktar-276071/
Materialdy kóshirip basqanda Kaz.tengrinews.kz saityna gipersilteme mindetti túrde qoiylýy tiis. Avtorlyq quqyqty saqtańyz.
.jpeg)