Qazaqstan Respýblikasy Syrtqy ister ministrligi Aýǵanstannyń Qabyl qalasynda bolǵan terroristik shabýylǵa qatysty málimdeme jasady, - dep habarlaidy "Ult aqparat" ministrliktiń baspasóz qyzmetine silteme jasap.
Vedomstvo ókilderi Qazaqstannyń Qabyldaǵy Intercontinental qonaqúiineqonaq úiinde beibit halyqtyń, sondai-aq Aýǵanstanǵa beibit maqsatpen kelgen shetel azamattarynyń ólimine alyp kelgen terroristik áreketti qatań aiyptaityndaryn aitady.
"Atalǵan qatygez jáne óreskel áreket Aýǵanstan úshin ǵana emes, osy eldegi beibitshilik pen damýdy qalpyna keltirýge atsalysyp jatqan barlyq halyqaralyq qaýymdastyq úshin qaýip-qaterler bolyp tabylady. Qazaqstan Aýǵanstandaǵy terrorizm máselesin túbegeili sheshý úshin jedel sharalar qabyldaý qajettiligin tolyq jaýapkershilikpen málimdeidi. Qazaqstan Aýǵanstandaǵy barlyq saiasi kúshterdi ulttyq tatýlasý boiynsha kelissózder júrgizýge shaqyrady.
Qazaqstan BUU Qaýipsizdik Keńesiniń tóraǵasy retinde jáne ulttyq negizde Aýǵanstandaǵy jaǵdaidy turaqtandyrýǵa, terrorizmdi basýǵa jáne eldi qalpyna keltirýge jan-jaqty járdem kórsetýdi jalǵastyrady", - delingen ministrliktiń málimdemesinde.
Sondai-aq, BUU Qaýipsizdik Keńesi Tóraǵasynyń qańtarda qabyldaǵan málimdemesi halyqaralyq qaýymdastyqty osy eldegi saiasi jaǵdaidy turaqtandyrý maqsatynda Aýǵanstanǵa qoldaý kórsetýge shaqyratyny aitylady.
"Qaza bolǵandardyń týystary men jaqyndaryna kóńil aitamyz, sondai-aq jaraqat alǵandardyń tez arada saýyǵyp ketýin tileimiz", - dedi QR SIM baspasóz qyzmetindegiler.
Osyǵan deiin 21 qańtarda Kabýldaǵy Intercontinental qonaqúiine sodyrlardyń shabýyl jasap, Qazaqstannyń 1978 jylǵy azamatynyń qaza tapqany habarlanǵan bolatyn.
Eske salaiyq, 20 qańtarda keshki ýaqytta sodyrlar Intercontinental Hotel qonaqúiine basyp kirgen. Tolo News telearnasyna silteme jasaǵan RIA Novosti málimetinshe, 18 saǵat boiy jalǵasqan shabýyl toqtatylǵan. Nátijesinde 126 adam qutqarylǵan, olardyń 41-i sheteldik.
