Júzege asqan jobalardyń áleýmettik-ekonomikalyq tiimdiligine taldaý jasalady.
Bul týraly Tótenshe jaǵdai rejimin qamtamasyz etý jónindegi Memlekettik komissiianyń qorytyndy otyrysynda Memleket basshysy Qasym-Jomart Toqaev aitty, dep habarlaidy "Ult aqparat".
«Biz «Jumyspen qamtýdyń jol kartasy» baǵdarlamasyn júzege asyrýǵa 1 trillion teńgege jýyq qarjy bólip otyrmyz. Bul – qomaqty qarajat. Ony shaǵyn biznesti nesieleýge de paidalanýǵa bolady. Sonyń bári quzyrly oryndardyń baqylaýynda bolyp, tolyǵymen maqsatqa sai jumsalýy tiis. Osy kúrdeli kezeńde qarjylandyrylyp jatqan jobalar arqyly eń aldymen jańa jumys oryndaryn ashý qajet. Buǵan jumysshylardy barynsha kóptep tartý kerek», - dedi Memleket basshysy.
QR Prezidenti únemi ekonomikalyq tabys ákeletin nemese adami kapitaldy damytatyn bastamalar qolǵa alynýy qajettigin atap ótti. Osyǵan qarai, mektep, aýrýhana jáne basqa da nysandar salynyp, jańǵyrtý jumystary júrgizilýge tiistigin basa aitty.
«Birkelki nysandardyń ár aimaqtaǵy quny óte alshaq bolýyna jol bermeý asa mańyzdy. Ókinishke qarai, mundai jaǵdai bizde kóp kezdesedi. Júzege asqan jobalardyń áleýmettik-ekonomikalyq tiimdiligine taldaý jasalady», - dedi Qasym-Jomart Toqaev.
