Qazaqstan Respýblikasy Prezidenti Ákimshiligi Basshysynyń birinshi orynbasary Dáýren Abaevtyń tóraǵalyǵymen Qazaqstan Respýblikasy Prezidenti janyndaǵy jastar saiasaty jónindegi keńestiń kezekti XXIV otyrysy ótti, dep habarlaidy "Ult aqparat" Aqordanyń resmi saityna silteme jasap.
Keńes otyrysynyń jumysyna Úkimet músheleri, Májilis depýtattary, respýblikalyq jastar uiymdarynyń basshylary, jastar saiasaty salasyndaǵy sarapshylar, sondai-aq, óńirlerdegi jastar saiasaty máselelerine jetekshilik etetin oblys ákimderiniń orynbasarlary qatysty.
– Táýelsizdik jyldarynda Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń basshylyǵymen elimizde jastar saiasatynyń negizi qalandy. Sol saiasattyń jalǵasy retinde, Prezident Qasym-Jomart Kemeluly Toqaev ta jastar máselesine airyqsha basymdyq berip, únemi nazarda ustap otyrady. Sondai-aq Memleket basshysynyń «Táýelsizdik bárinen qymbat» maqalasynda jastar saiasatyna qatysty birqatar tapsyrma berdi. Soǵan sáikes, Qazaqstan Respýblikasy Prezidenti janyndaǵy Jastar saiasaty jónindegi keńestiń qyzmetin odan ári jetildirý qolǵa alyndy, – dedi Dáýren Abaev.
Qazaqstan Respýblikasy Prezidenti Ákimshiliginiń Ishki saiasat bólimi meńgerýshisiniń orynbasary, Keńes hatshysy Evgenii Glotov Qazaqstan Respýblikasy Prezidenti janyndaǵy Jastar saiasaty jónindegi keńestiń jańa formaty týraly baiandady.
Aqparat jáne qoǵamdyq damý ministri Aida Balaeva ózi basqaratyn ministrliktiń aldyna jastar saiasatyna qatysty qoiylǵan strategiialyq mindetter týraly aitty.
Atap aitqanda, biyl jyl sońyna deiin Memlekettik jastar saiasaty týraly zańnamaǵa ózgerister engizilip, QR Parlamentiniń qaraýyna usynylýy kerek. Onda «Jastardyń damý indeksi», «Jastardyń áleýmettik qyzmetteri», «NEET sanatyndaǵy jastar» uǵymdary zańnamalyq turǵydan bekitilýi tiis. Sonymen birge ministrlik aldynda «Táýelsizdik urpaqtary» ulttyq jobasyn ázirleý mindeti tur. Munda jastardy memlekettik qoldaýdyń barlyq sharalaryn biryńǵai qujatqa biriktirý, sondai-aq, talantty jastardy qoldaý úshin «Táýelsizdik urpaqtary» granttaryn taǵaiyndaý jáne berý kózdelgen.
– Jastardy damytý indeksi jastar saiasatyn iske asyrý, monitoring, baǵalaý tásilderin birizdendirýge jáne naqty nátijelerge qol jetkizý úshin memlekettik, ásirese, jergilikti organdardyń jaýapkershiligin arttyrýǵa baǵyttalǵan, – dedi Aida Balaeva.
Sondai-aq jastar saiasatynyń jekelegen baǵyttary boiynsha keńes músheleri, «Atameken» ulttyq kásipkerler palatasy basqarma tóraǵasynyń orynbasary Oljas Ordabaev baiandama jasap, «Júzden júirik» baǵdarlamasyna kásipkerlik salasyn engizýdi usyndy.
QR Energetika ministrliginiń «Iadrolyq fizika institýty» respýblikalyq memlekettik kásipornynyń Nur-Sultan qalasy boiynsha filialynyń direktory, fizika-matematika ǵylymdarynyń kandidaty, qaýymdastyrylǵan professor Maksim Zdorovets ǵylymmen ainalysýǵa 5 jyldyq granttardy engizýdi usyndy. Bul otandyq ǵalymdar úshin uzaq merzimdi maqsattar qoiýǵa, bolashaǵy zor zertteýlerdi sapaly ári jańa deńgeige shyǵarýǵa múmkindik beretinin aitty.
Qazaqstan Respýblikasy Prezidentiniń janyndaǵy áleýmettik-ekonomikalyq reformalardy taldaý jáne monitoringileý ortalyǵynyń saraptamalyq-taldaý tobynyń konsýltanty Ádil Qusmanov jastar jetistikke jetip júrgen biznes, IT, áleýmettik-ekonomikalyq damý jáne memlekettik basqarý salasynda jáne taǵy basqa baǵyttar boiynsha memlekettik jastar syilyǵynyń sanyn arttyrýdy usyndy.
QR Prezidenti janyndaǵy Qazaqstan strategiialyq zertteýler institýty direktorynyń orynbasary Sabina Sádieva jastardy jas erekshelikteri boiynsha topqa bóle otyryp, olarmen maqsatty túrde jumys jasaý qajettigin atap ótti.
Otyrys qorytyndysy boiynsha Keńes tóraǵasy Dáýren Abaev birqatar naqty tapsyrma berdi.
– Memlekettik qoldaýdyń barlyq sharasy jastar úshin tiimdi, elge paidaly jobalar jasaýǵa baǵyttalýy tiis. Ol jastardyń kásibi baǵdar alýyna, mamandyqty durys tańdaýyna, óz densaýlyǵy úshin jaýapty bolýyna, tulǵa retinde qalyptasýyna, ómir ótkelderinde durys táýekel etip, súrinip ketpeýine jol ashýy kerek, – dedi Dáýren Abaev.
Esterińizge sala keteiik, Qazaqstan Respýblikasy Prezidentiniń janyndaǵy Jastar saiasaty jónindegi keńes – elimizdegi memlekettik jastar saiasatyn jetildirý jónindegi sharalardy ázirleý jónindegi basty dialog alańy. Biyl Memleket basshysynyń Jarlyǵymen Keńes quramy tolyǵymen jańartyldy. Oǵan Prezidenttik jastar kadr rezervi men Ulttyq qoǵamdyq senim keńesiniń ókilderi, respýblikalyq jastar uiymdarynyń basshylary, depýtattar, sarapshylar kirdi.
