Búgin Almatyda Memleket basshysy Qasym-Jomart Toqaev Prezident janyndaǵy Ulttyq qoǵamdyq senim keńesiniń músheleri Qairat Joldybaiulymen jáne Andrei Chebotarevpen kezdesý ótkizdi, dep habarlaidy "Ult aqparat" Aqordaǵa silteme jasap.
Qoǵam qairatkeri Qairat Joldybaiulymen kezdesýde demografiialyq saiasat, óskeleń urpaqtyń rýhani-adamgershilik tárbiesi jáne elimizdegi balalar ádebietin damytý máseleleri talqylandy.
«Alternativa» ózekti zertteýler ortalyǵynyń direktory Andrei Chebotarev Prezidenttiń Qazaqstan halqyna arnaǵan Joldaýynda aitylǵan bastamalaryna qoldaý bildirdi. Atap aitqanda aýyl ákimderiniń tikelei sailaýyn ótkizýdiń mańyzdylyǵy elimizdiń saiasi transformatsiia úderisindegi taǵy bir oń qadam ekenin aitty. Sonymen qatar kezdesýde jergilikti ózin-ózi basqarý isin odan ári damytý, memlekettik strategiialyq josparlaý júiesin jaqsartý, múlik menshikteriniń birlestigin qurý jáne onyń qyzmeti jónindegi usynystar qarastyryldy.
