Shanhai yntymaqtastyq uiymynyń shuǵyl ujymdyq sheshimdi talap etetin ekologiialyq problemalary tizimin qurý qajet.
Bul týraly Shanhai Yntymaqtastyq Uiymyna múshe memleketter basshylary keńesiniń otyrysynda QR Prezidenti Qasym-Jomart Toqaev aitty, dep habarlaidy "Ult aqparat".
«Biz ekologiialyq problemalardy, olardyń elimizdiń áleýmettik-ekonomikalyq damýyna teris saldaryn basty nazarda ustaýǵa mindettimiz. Sondyqtan da ShYU-ǵa múshe memleketterdiń tiisti vedomstvolary úshin osynaý problema boiynsha ózara is-qimyldy kúsheitý barynsha mańyzdy. ShYU-nyń shuǵyl ujymdyq sheshimdi talap etetin ekologiialyq problemalary tizimin qurý bul saladaǵy istiń jai-kúiine qatysty jaitty qalyptastyrýǵa múmkindik berer edi», - dedi Qazaqstan Prezidenti.
Memleket basshysy osy jyl Ekinshi dúniejúzilik soǵystyń aiaqtalýynyń jáne BUU qurylýynyń 75 jyldyǵy aiasynda ótip jatqanyn eske saldy.
«Kelesi jyly ShYU-nyń 20 jyldyǵyn atap ótemiz. Osynaý tarihi meje óńirlik jáne jahandyq problemalardy sheshýdiń kelisimdi ádisteriniń túbegeili mańyzdy ekendigin eske túsiredi. Halyqaralyq seriktestik aiasyn keńeitýge arnalǵan syrtqy ashyqtyq pen naqtylyq túptep kelgende uiymymyzdyń tiimdiliginiń kepili sanalady. ShYU-nyń ózge de halyqaralyq, onyń ishinde BUU júiesine kiretin uiymdarmen yntymaqtastyq týraly memorandýǵa qol qoiý týraly sheshimin qoldaimyz. ShYU mereitoiy - bul onyń súbeli jetistigin tek qana atap ótý úshin emes, sonymen birge paidaly sabaq alý úshin kemshin tustardy anyqtaý úshin de jaqsy múmkindik», - dep atap ótti Qasym-Jomart Toqaev.
Osy rette QR Prezidenti uiym hatshylyǵyna ShYU-nyń tetikteri men organdary qyzmetin jetildirý boiynsha naqty usynystar engize otyryp, onyń qyzmetine jan-jaqty saraptama ázirleýdi tapsyrý usynysyn jasady.
