Qazaqstan Prezidenti Qasym-Jomart Toqaev Birikken Ulttar Uiymynyń 75 jyldyǵyna orai BUU Bas hatshysy Antoniý Gýterrishke quttyqtaý jedelhatyn joldady, dep habarlaidy "Ult aqparat" Aqordaǵa silteme jasap.
– Búginde barlyq ulttar ótkenge kóz júgirte otyryp, BUU-nyń osy jyldar ishinde qol jetkizgen úzdiksiz ilgerileýdiń jarqyn jolyn maqtanyshpen baǵalai alady. Tipti qazirgi, álem bastan keship otyrǵan geosaiasat pen ekonomikadaǵy, ásirese, densaýlyq saqtaý salasyndaǵy aýyr daǵdarysty bastan ótkerip otyrǵan kezde, BUU-na milliondaǵan adamdar, onyń ishinde, osal toptar úlken úmitpen qaraidy, – delingen jedelhatta.
Memleket basshysy BUU júiesiniń tiimdiligin, esep beretindigin jáne mámilegershiligin arttyrýǵa baǵyttalǵan Antoniý Gýterrishtiń strategiiasy men ainymas kúsh-jigerin tolyq qoldaitynyn atap ótti.
– Biz Birikken Ulttar Uiymynyń Jarǵysynda bekitilgen negizgi maqsattar men qaǵidattardyń saqtalýyna jáne qorǵalýyna tikelei jaýaptymyz. BUU-nyń turaqty, qaýipsiz jáne inkliýzivti bolashaqty qamtamasyz etýge baǵyttalǵan is-qimyldaryn Qazaqstan tolyǵymen qoldaitynyn rastaimyn, – dedi Qazaqstan Prezidenti.
Jedelhatta Qasym-Jomart Toqaev Antoniý Gýterrishke jáne BUU-nyń barsha qyzmetkerine igi bastamalarynyń tabysty bolýyna tilektestik bildirdi.
