Jańadan ashylǵan "Astana" Halyqaralyq qarjy ortalyǵy - Táýelsiz Qazaqstannyń jańa paraǵy. Elordada ótken qarjy ortalyǵynyń ashylý saltanatynda Memleket basshysy osylai dedi, dep habarlaidy QazAqparat tilshisi.
"Astana" Halyqaralyq qarjy ortalyǵy - Táýelsiz Qazaqstannyń jańa paraǵy. Onyń ashylýy mańyzdy qadam, bizdiń ekonomikanyń bekem túrde damýynyń jalǵasy bolyp tabylady. Jahandyq syn-tegeýrinderge jaýap retinde AHQO-ny qurý týraly ideiany eń alǵash ret 2015 jyly aitqan edim", - dedi Nursultan Nazarbaev.
Prezident atap ótkendei, AHQO qatysýshylaryna salyq boiynsha 50 jylǵa deiin, sondai-aq vizalyq jáne eńbek boiynsha jeńildikter qarastyrylǵan.
"Bul, jumysy aǵylshyn quqyǵyna negizdelgen aimaqtaǵy birden-bir qarjy ortalyǵy. Táýelsiz sot, halyqaralyq arbitrajdy ortalyq taraptardyń quqyqtarynyń ádiletti qaralýyn qamtamasyz etedi. AHQO sýdialary retinde meniń sheshimimmen Angliia men Ýeelsten kelgen 9 abyroily sýdia taǵaiyndaldy. Olardy lord Výlf myrza - Angliianyń burynǵy Joǵarǵy sýdiasy basqarady. Arbitrajdy ortalyqqa sonymen birge taǵy 23 halyqaralyq arbitraj endi", - dedi Nursultan Nazarbaev.
Memleket basshysy tilge tiek etkendei, AHQO-ny tiimdi basqarýdyń qaǵidattary men pragmatizmi saqtalyp, barlyq investorlardyń múddeleri qorǵalatyn bolady.
"Qor naryǵyn damytatyn qatysýshylardyń yńǵaiy úshin AHQO birjasy - joǵary tehnologiialyq infraqurylym quryldy. Búgin sizdermen osy birjanyń jumysyn bastaimyz. Onyń jumysyna amerikalyq Nasdaq birjasy jáne Shanhai qor birjasy qatysady", - dedi Memleket basshysy.
Eske sala ketsek, elordadaǵy Kongress holl ortalyǵynda Elbasy Nursultan Nazarbaevtyń qatysýymen «Astana» halyqaralyq qarjy ortalyǵynyń resmi ashylý rásimi ótti.
.jpeg)