QR Ortalyq sailaý komissiiasy QR Parlamenti Májilisiniń jáne máslihattardyń depýtattaryn sailaýyna 29 sheteldik baiqaýshyny akkredittedi, dep habarlaidy "Ult aqparat".
«2020 jyldyń 22 qazanda QR Ortalyq sailaý komissiiasy sailaý naýqanyna orai halyqaralyq baqylaý institýtyn ashty. QR Syrtqy ister ministrligi sailaýdy baiqaýǵa qatysý úshin 11 halyqaralyq uiymǵa tiisti shaqyrýlar jiberdi. Sonymen birge ekijaqty negizde QR Ortalyq sailaý komissiiasy 25 shet memlekettiń Ortalyq sailaý komissiialaryna shaqyrýlar jiberip otyr. QR Konstitýtsiialyq zańnyń 20-2-babyna sáikes shet memleketterdiń, halyqaralyq uiymdardyń baiqaýshylaryn akkreditteýdi Ortalyq sailaý komissiiasy Syrtqy ister ministrliginiń usynýy boiynsha júzege asyrady», - dedi A.Shegortsova OSK otyrysynda.
QR OSK múshesiniń aitýynsha, elimizdiń Syrtqy ister ministrligi Táýelsiz Memleketter Dostastyǵyna qatysýshy memleketterdiń Parlamentaralyq Assambleiasynan 29 baiqaýshyny akkreditteýge usynǵan.
«Akkreditteýge usynystardyń kelip túsýine qarai baiqaýshylar boiynsha derekter jańartylatyn bolady», - dedi ol.
Osydan keiin QR OSK músheleri barlyq 29 baiqaýshyny akkreditteý týraly qaýlyǵa biraýyzdan qoldap daýys berdi.
