Japoniianyń Fýkýoka prefektýrasyndaǵy Kýrýme qalasynda Qazaqstan Ulttyq Olimpiadalyq komiteti men japon taraby 2020 jylǵy Tokio Olimpiadasynyń qarsańynda olimpiadalyq quramalardy daiyndaý týraly áriptestik memorandýmǵa qol qoidy, dep habarlaidy Ulttyq Olimpiadalyq komitettiń baspasóz qyzmeti.
24 shildede Japoniiadaǵy Olimpiada oiyndarynyń bastalýyna týra eki jyl ýaqyt qalǵanda Qazaqstan UOK Sport direktsiiasynyń basshysy Elsiiar Qanaǵatov pen Fýkýoka gýbernatory Hiroshi Ogava, qala meri Tsýtomý Okýbo áriptestik týraly kelisimdi bekitti. Bul kelisim boiynsha sportshylar tórtjyldyqtyń basty dodasyna sapaly daiyndyq kezeńin júrgizip, atletter úshin mańyzdy sanalatyn akklimatizatsiiadan ótýge múmkindik beriledi.
Saltanatty rásim qaiǵyly jaǵdaida kóz jumǵan sportshy, Olimpiada oiyndarynyń júldegeri Denis Tenniń qazasyna bailanysty Qazaqstanǵa kóńil aitýdan bastaldy. Kýrýme qalasynyń meri Okýbo myrzanyń aitýynsha, bul tragediia qazaqstandyq mánerlep syrǵanaýshynyń talantyn qurmetteitin Japoniia halqyn dúr silkintken.
Maýsym aiynda Kýrýme qalasynda 2020 jylǵy oiyndar qarsańynda ulttyq quramalardy qabyldaityn, barlyq halyqaralyq talaptarǵa jaýap beretin jańa kópsalaly sport kesheni ashyldy. Keshende oiyn túrlerine arnalǵan barlyq komandalardyń jattyǵý júrgizýine múmkindik bar. Atap aitar bolsaq, sporttyq gimnastika, ústel tennisi, jekpe-jek túrleri, jeńil atletika jáne kanoemen eskek esýshilerge barlyq jaǵdai qarastyrylǵan. Atalǵan kelisim aiasynda japondyqtar otandyq sportshylardyń qaitarymsyz negizde jattyǵý jasaýyna múmkindik beredi.
Aita ketelik, Qazaqstan UOK Japoniiadaǵy jattyǵý ortalyqtarymen kelisim júrgizýdi Rio-de-Janeirodaǵy Olimpiada oiyndarynan keiin bastaǵan bolatyn. UOK tek qana Fýkýoka prefektýrasymen ǵana emes, Nara prefektýrasynyń ókilderimen de kelisimge kelýde.
«Tokio Olimpiadasynyń bastalýyna áli eki jyl baryna qaramastan, Qazaqstan UOK sportshylardyń alańsyz daiyndyǵyn uiymdastyrý úshin belsendi túrde jumys isteýde. Biz ulttyq qurama sportshylary úshin eń úzdik degen jattyǵý ortalyqtaryn taýyp qana qoimai, birlesken oqý-jattyǵý jiyndaryn ótkizý jóninde de kelisimge kelemiz. Olimpiadalyq sport túrlerindegi quramalardyń jattyǵýyn retteý úshin Japoniianyń ózge de prefektýralarymen kelissózder júrgizemiz», - deidi Sport direktsiiasynyń basshysy Elsiiar Qanaǵatov.
Kýkrýme qalasynyń meri 2020 jylǵy Olimpiada oiyndarynyń qarsańynda Qazaqstannyń olimpiadalyq quramasyn qabyldaý úlken abyroi ekenin aitty. Okýbo myrza zamanaýi jattyǵý ortalyqtary otandyq sportshylardyń daiyndyǵyna óz úlesin qosady degen senimde.
