Foto: Á. Qasteev atyndaǵy QR Memlekettik óner mýzeiiniń baspasóz qyzmetinen
9 sáýirde Ábilhan Qasteev atyndaǵy QR Memlekettik óner mýzeiinde belgili qazaqstandyq sýretshi, KSRO Sýretshiler Odaǵynyń múshesi Ivan Stadnichýktyń 112 jyldyǵyna arnalǵan jeke kórmesiniń ashylýy ótedi, dep habarlaidy Ult.kz.
Ekspozitsiiada otbasylyq kollektsiiadan, sonymen qatar Ábilhan Qasteev atyndaǵy QR MÓM qorynan avtordyń 50-den astam keskindemelik, akvareldik týyndylary usynylady.
Sýretshi shyǵarmashylyǵy – kórermenine jarqyn da, qýanyshqa toly áser syilaityn tutas álem. Ótken kún men búgindi toǵystyrǵan kóp tústi palitramen biriktirilgen kompozitsiialaryndaǵy ártúrli kóńil-kúi beinelengen portret, peizaj, natiýrmorttardyń barlyǵy tabiǵat pen alýan tús ásemdigimen jarysqandai sezim qaldyrady. Qylqalam túsirgen árbir boiaýda sýretshiniń jigerli sezimi men shabyttardyń tutas úilesimdiligi seziledi.
Foto: Á. Qasteev atyndaǵy QR Memlekettik óner mýzeiiniń baspasóz qyzmetinen
I.Stadnichýk shyǵarmashylyǵynyń mańyzdy bólimi akvarel jumystary bolyp tabylady. Sýretshi názik boiaýlardy aýystyra otyryp, peizajdardaǵy tústerdi, natiýrmorttaǵy zattardyń materialdylyǵyn, sonymen qatar sheberdiń sáldegúliniń sándi gúl shoǵy bolsyn, qarapaiym túimedaq gúli bolsyn súiikti gúlderiniń tabiǵi beinesi men tehnikanyń biregei múmkindikterin aiqyn kórsetedi.
Foto: Á. Qasteev atyndaǵy QR Memlekettik óner mýzeiiniń baspasóz qyzmetinen
Ivan Iakovlevich Stadnichýk 1913-jyly Ýkrainanyń Berdychev qalasynyń mańyndaǵy Halaimgorodok aýylynda dúniege kelgen. UOS ardageri. Qyzyl Juldyz ordenimen jáne KSRO medaldarymen marapattalǵan. Sýretshi Ózbekstanda, Buharda, Samarqanda jáne Tashkentte turdy. Tanymal músinshi Ia.Kýchispen kezdesýi onyń sýretshi bolýǵa degen umtylysyna áser etti. 1940 - jyly Tashkent kórkemóner ýchilishesin bitirgennen keiin, I.Repin atyndaǵy Leningrad keskindeme, músin jáne sáýlet institýtyna tústi. Ataqty grafik-illiýstrator, RKFSR eńbek sińirgen sýretshisi M.Z.Rýdakovtan dáris alǵan.
Foto: Á. Qasteev atyndaǵy QR Memlekettik óner mýzeiiniń baspasóz qyzmetinen
1952-jyly sýretshi Almatyǵa kelip, N.Gogol atyndaǵy Almaty kórkemsýret ýchilishesinde, Abai atyndaǵy QazPI-da ustazdyq qyzmet atqara júrip, izbasarlaryn tárbieledi. Qazaqstan Sýretshiler odaǵynyń shyǵarmashylyq jáne qoǵamdyq ómirine belsene qatysty. Sýretshiniń ómirinde erekshe oryn alǵan «Piatnitsa» áýesqoi sýretshiler stýdiiasyn quryp, onda 30 jyldan astam ýaqyt jetekshilik etken. Ol Qazaqstanda beineleý óneriniń qalyptasýy men damýyna eleýli úles qosty. Sýretshiniń jumystary Ábilhan Qasteev atyndaǵy Qazaqstan Respýblikasy Memlekettik óner mýzeiiniń qory men búkil álem boiynsha mýzeiler men jeke jinaqtarda saqtaýly.
Ekspozitsiia mamyr aiynyń 4-ne deiin jalǵasady.
