Foto: Instagram\amre_official
QR Mádeniet jáne aqparat ministri Aida Balaeva Amre ataýymen tanymal ánshi Ernar Sadyrbaevqa Intervidenie-2025 baiqaýyna qatysqannan keiin qoldaý kórsetti.
Ol óziniń Instagram áleýmettik jelisindegi paraqshasynda ánshiniń sheberligin joǵary baǵalap, bir ǵana baiqaýdyń onyń óneriniń aýqymyn anyqtai almaitynyn aitty.
-Siz biz úshin árdaiym jeńimpazsyz. Baiqaýda joǵary deńgeide óner kórsettińiz. Árine, jeńis te jeńilis te qatar júredi. Biraq bir baiqaý barlyq ónerdiń ólshemi emes. Sizdiń erek talantyńyzdy bárimiz qurmet tutamyz. Jarqyn jeńister áli de alda. Sizge tek myqty densaýlyq, sarqylmas kúsh-jiger men shyǵarmashylyq tabys tileimin!,-dep jazdy Aida Balaeva.
Aita keteiik, baiqaýda Amre qazaq tilinde «Dalanyń nury» ánin oryndap, alǵashqy ondyqqa kirdi. Baiqaýǵa qatysýshy árbir ónerpazdyń erekshe ekenine qaramastan qazaqstandyq ánshiler kórermender tarapynan erekshe qoshametke ie boldy.
