QR Densaýlyq saqtaý ministrligi Qordaidaǵy jappai tóbeles kezinde zardap shekkenderdiń barlyǵyna meditsinalyq kómek kórsetiletinin málimdedi, dep habarlaidy "Ult aqparat".
«Qazir Memleket basshysynyń tapsyrmasy boiynsha Masanchi aýylynda Úkimettik komissiia jumys isteýde. Jedel meditsinalyq kómek kórsetý úshin oqiǵa ornyna shuǵyl túrde mamandar toby jáne shuǵyl meditsinalyq kómek brigadalary jiberildi. 100-den astam meditsina qyzmetkeri men 36 sanitarlyq kólik, onyń ishinde 2 sanitarlyq aviatsiia tikushaǵy tartyldy» dep habarlaidy QR DSM baspasóz qyzmeti.
10 aqpandaǵy málimetke sáikes, jappai janjal saldarynan 178 adam zardap shekti, 10 adam qaza tapty (8 - oqiǵa ornynda, aýyr jaraqat alǵan 2 adam aýrýhanada).
Ministrlik málimetine sai, meditsinalyq kómekke 170 adam júgindi. Ótinish bildirgenderdiń: 117-sine ambýlatorlyq kómek – (102 - QR, 15 Qyrǵyz Respýblikasynda); 53 adamǵa statsionarlyq kómek - (43 – QR, 10 – Qyrǵyz Respýblikasynda) kórsetildi.
10.02.2020 jylǵy saǵat 12.00-degi jaǵdai boiynsha statsionarlyq emdelýde 41 naýqas: Almaty qalasynyń statsionarlarynda – 25; Jambyl oblysynda – 14; Qyrǵyz Respýblikasynyń statsionarlarynda – 2. Onyń ishinde: reanimatsiiada 9, beiindi bólimshelerde túrli jaraqat alǵan 32 patsient bar. 17 naýqasqa ota jasaldy.
Aita ketý kerek, búgin, iaǵni, 10 aqpanda Qordaidaǵy aýdandyq ortalyq aýrýhanada 1 patsientti jáne Qyrǵyz Respýblikasynan 2 patsientti Almaty qalasynda tasymaldaýǵa daiyndyq júrgizilýde.
Patsientterge meditsinalyq kómektiń barlyq túri men kólemi TMKKK sheńberinde tegin kórsetiletinin atap ótý qajet.
Qazir naýqastar mamandardyń baqylaýynda jáne qajetti em alýda.
