QR Densaýlyq saqtaý vitse-ministri Aleksei Tsoi temirjol aýrýxanasynda bolǵan jaǵdaiǵa qatysty pikir bildirdi, dep xabarlaidy QazAqparat tilshisi.
«Endi, quziretti organdar óz baǵasyn bere jatar. Degenmen, dárigerdiń etikasy boiynsha adamǵa kúsh kórsetýge tyiym salynǵan. Árine, bir sebepter boldy. Ony quqyq qorǵaýshylar anyqtaidy. Sotta da eki jaq óz ustanymyn aitatyn shyǵar», - dedi A.Tsoi jýrnalisterge bergen suxbatynda.
Onyń aitýynsha, tóbeles kezinde kim qandai kóńil-kúide boldy, óz áreketine jaýap berdi me, joq pa, osynyń bárin jan-jaqty qarastyrý qajet.
«Ashyǵyn aitý kerek, kei kezde patsientter qatty aýyryp keledi de, ursyp sóileidi. Mas kúiinde keletinder de bolady. Sodan neshe túrli jaǵdailar týyndaidy. Endi, bul jolǵy jaǵdai solai aiaqtaldy. Tekseris bastaldy. Jaqyn arada naqty sebepterin anyqtap jariialaimyz», - dep atap kórsetti A.Tsoi.
Aita keteiik, Astanadaǵy ortalyq temirjol aýrýhanasy meditsinalyq qyzmetkerdiń naýqasty sabaý oqiǵasyn rastady.
Bas dáriger Sergei Demochkinniń aitýynsha, naýqas adamdy 26 jastaǵy kezekshi terapevt tepkilegen.
«Soqqyǵa jyǵylǵan naýqas aýrýhanaǵa 2 qazanǵa qaraǵan túni bas jaraqatymen mas kúiinde jetkizilgen. Naýqas ózin dóreki ustap, meditsinalyq qyzmetkerlerdi balaǵattaǵan. Ony kezekshi neirohirýrg teksergen jáne jarasyn tańyp, úiine jibergen. Biraq, aýrýhanaǵa qaityp kelip, joǵalǵan telefonyn taýyp berýdi talap etken. Sol sátte naýqas aýrýhananyń kezekshi terapevtine tiisip, jaqyn týystaryn balaǵattaǵan jáne bokstan sport sheberi ekenin aityp, jekpe-jekke shaqyrǵan. Bir ret urǵanda dáriger esh jaýap qaitarmaǵan, al ekinshi ret urǵanda naýqasty keýdesinen itergen. Jerge qulaǵan naýqasty ashýmen tepken», - dedi S. Demochkin.
Osyǵan deiin naýqasty soqqyǵa jyqqan dárigerdiń jumystan bosatylǵandyǵy habarlandy. Sondai-aq oǵan qatysty qylmystyq is qozǵaldy.
