QR Densaýlyq saqtaý ministri Eljan Birtanov Facebook paraqshasynda dárigerlerge tólenetin ústemeaqy týraly aityp, olardyń shaǵymyna jaýap berdi, dep habarlaidy QazAqparat.
«Meniń qurmetti áriptesterim, qymbatty Janar Muhamedjanova, Tamara Ámirbekova, Tatiana Borisovna, Gúlnara Hairina jáne Aiman Oralbaeva. Sizderdiń málimdemelerińizdi júregim aýyryp otyryp oqydym jáne sizderdiń narazylyqtaryńyzdy túsinemin. Sizder júrgen COVID-19 juqtyrǵandarǵa arnalǵan statsionardaǵy jaǵdai sizderde ǵana emes, mende de úlken suraq týyndatatynyn moiyndaýǵa májbúrmin.
Ortalyq statsionar birneshe ret infektsiiadan ótti, tekserildi jáne osy infektsiiany emdeý úshin barlyq zamanaýi talaptarǵa sáikes oqshaýlaǵysh dep anyqtaldy.
Qazir osy fakti boiynsha komissiia quryp jatyrmyn jáne taiaý ýaqytta bul oqiǵany sheshýge ýáde etemin. Dál sizderdiń aldyńǵy sapta júrip, naýqastardy ómirin arashalap jatqandaryńyzdy jaqsy túsinemin!
Týystaryńyzdy, jaqyndaryńyz ben balalaryńyzdy tastap, búkil ýaqytyńyzdy jumys ornynda ótkizip jatqandaryńyzdy da bilemin. Memlekettik komissiianyń jaqyn aradaǵy otyrysynda aýrýmen kúresip jatqan dárigerlerge barlyq jaǵdai jasaý máselesin kóterip, taǵy bir nazar aýdartamyn.
Gúlnara, Siz: «Memleket pen kásipkerler qaiyrymdylyqqa bólgen aqshalar qaida ketti?» dep suraq qoidyńyz.
Olar túrli maqsatqa: jeke qorǵaný quraldaryn, dári-dármek quraldaryn, meditsinalyq quraldardy, koronavirýsty diagnostikalaýǵa arnalǵan testilerdi satyp alýǵa, bizdiń azamattardy «qaýipti» elderden evakýatsiialaýǵa, meditsina qyzmetkerleri men eldiń ekonomikasyn osy qiyn kezeńde qoldaýǵa jumsalyp jatyr. Dárigerlerge kórsetiletin kómek týraly aitar bolsaq, myna dúnieni naqty aita alamyn – el Prezidentiniń tapsyrmasy boiynsha taiaý kúnderi epidemiialyq sharalarǵa qarsy tartylǵan meditsina qyzmetkerlerine ai saiyn ústeme aqy belgilenedi. Barlyǵyńyz juqtyrý qaýpi joǵary adamdar tobyna jatasyzdar, bul árine, el basshylyǵyn alańdatyp otyr, sizderdi qorǵaý úshin barlyq sharalar jasalýda», - dep jazdy ministr.
Densaýlyq saqtaý ministri syilyqaqy berý úshin qaýpi boiynsha 3 top belgilengenin atap ótti.
«Qaýiptiligi asa joǵary top úshin 850 myń teńge kóleminde ústemeaqy belgilendi – buǵan reanimatsiia bólimshelerin qosa alǵanda, infektsiialyq statsionarlardyń dárigerleri, orta jáne kishi meditsina qyzmetkerleri jatady. Ekinshi toptaǵy medqyzmetkerlerdiń jalaqysyna 425 myń teńge qosylady. Úshinshi orta top úshin 212,5 myń teńge ústeme aqy belgilengen», - delingen habarlamada.
Eljan Birtanov atalǵan sanatqa jatpaityn dárigerlerden kóptegen ótinish túsip jatqanyn aitty.
«Qazirgi ýaqytta Densaýlyq saqtaý ministrligi Memleket basshysynyń dárigerlerdiń eńbegin yntalandyrý jónindegi tapsyrmalaryn iske asyrý boiynsha jumys istep jatyr. Atap aitqanda, biz tizim jasaý tetigi jáne meditsina qyzmetkerlerine qosymsha aqy qalai tólenetini egjei-tegjeili qarastyrylǵan qosymsha buiryq ázirlep jatyrmyz. Eń aldymen juqpaly aýrýlar aýrýhanalarynda jumys isteitinderdi, jansaqtaý bóliminde ómir úshin kúresip jatqandardy, sondai-aq jańa koronavirýs infektsiiasyna qarsy kúreske tartylǵan barlyq medqyzmetkerler tizimge enedi.
Barlyq sheshim ashyq túrde, komissiia aldynda qabyldanady. Óńirlerde komissiia quramynda qoǵam jáne kásipodaq uiymdary, «Nur Otan» partiiasy, jergilikti atqarýshy organdar – densaýlyq saqtaý basqarmasy men áleýmettik qorǵaý basqarmasynyń ókilderi kiredi», - dep jazdy ministr.
Ol aqpan aiynda Áleýmettik mediitsnalyq saqtandyrý qory esebinen Nur-Sultan jáne Almaty qalalarynda jumyldyrylǵan dárigerlerge eki ese jalaqy tólengenin eske saldy.
«Prezident tapsyrmasy boiynsha, jumyldyrylǵan medqyzmetkerlerge ústemeaqy tóleý maqsatynda respýblikalyq biýdjetten qosymsha qarajat bólindi. Sáikes buiryq shyqqannan keiin 5 sáýirge qarai naýryz aiy úshin tólemder tólenedi», - dedi Eljan Birtanov.
Sondai-aq, densaýlyq saqtaý ministri barlyq medqyzmetkerlerdi qalaýy boiynsha koronavirýsqa qarsy kúresýge shaqyrdy.
«Búginde búkil álem syn-qaterge tap boldy. Biraq biz birge alǵa qarai jyljyp kelemiz, turǵyndardy aýrý juqtyrýdan qorǵaý úshin barlyq sharalardy jalǵastyryp jatyrmyz. Bul barlyǵymyz birlesip ótetin synaq. Bizge kómekteskisi keletin áripstesterimizdi komandamyzǵa qosylýǵa shaqyramyn! Ol úshin sizder oblystaǵy nemese qaladaǵy densaýlyq saqtaý basqarmasynyń kadr bólimine habarlasýlaryńyz kerek.
Qurmetti áriptester! Bizge qazir búkil el qarap otyr, qoldaý kórsetip, senim bildirip jatqanyn umytpaýymyz kerek!», - dep jazdy ministr.
