Búgin QR Bas prokýratýrasy buqaralyq aqparat quraldarynyń ókilderi úshin Quqyqtyq statistika jáne arnaiy esepke alý komitetiniń tsifrlyq jobalaryn tanystyrdy, dep habarlaidy QazAqparat.
QR Bas prokýrorynyń orynbasary Marat Ahmetjanov is-sharany asha otyryp, «Tsifrlyq Qazaqstan» memlekettik baǵdarlamasy aiasynda memlekettik organdarmen birlesip qylmystyq jáne ákimshilik protsesterdi avtomattandyrý, tekserýler taǵaiyndaý, ótinishtermen jumys boiynsha jobalar iske asyrylǵanyn atap ótti.
Olar memlekettik organdardyń qyzmetin ońtailandyrýǵa, azamattardyń quqyqtaryn qorǵaýdy kúsheitýge, quqyqtyq statistikanyń ashyqtyǵy men anyqtyǵyn qamtamasyz etýge, sybailas jemqorlyq táýekelderin barynsha azaitýǵa, sondai-aq biýdjet qarajatyn únemdeýge baǵyttalǵan.
Jýrnalisterge «Ákimshilik is júrgizýlerdiń biryńǵai tizilimi» «Tekserý sýbektileri men obektileriniń biryńǵai tizilimi», «Elektrondyq ótinishter» tsifrlyq jobalarynyń múmkindikteri jáne «Qamqor» aqparattyq servisi kórsetildi.
Atap aitqanda, shaqyrylǵandar Memleket basshysynyń 2020 jylǵy 1 qyrkúiektegi «Jańa jaǵdaidaǵy Qazaqstan: is-qimyl kezeńi» Joldaýynda berilgen tapsyrmalaryn oryndaý aiasynda iske asyrylatyn «Sotqa deiingi tergeýdiń biryńǵai tizilimi» (SDTBT) júiesinde sotqa deiingi tergeý organdarynyń negizgi sheshimderin prokýrorlarmen kelisý tártibimen tanysty.
Budan basqa, qylmystyq protseske qatysýshylardyń qabyldanǵan protsestik sheshimderdi qashyqtyqtan qadaǵalaýǵa, kelispegen jaǵdailarda olarǵa ýaqtyly shaǵymdanýǵa múmkindigi bar. Mundai model protsestik qujattardy daiyndaý ýaqytyn jáne tergeý merzimderin qysqartady, qylmystyq qýdalaý sheńberine zańsyz tartylǵan adamdardyń quqyqtary men bostandyqtaryn qorǵaýdy qamtamasyz etedi. Osy jańalyqtardy iske asyrý qylmystyq protsestiń úsh býyndy modeline kóshýdiń birinshi kezeńi bolyp tabylady.
