QR Aýyl sharýashylyǵy ministrligi brakonerlermen qaqtyǵysta aýyr jaraqat alyp, qaza tapqan inspektor Erlan Nurǵalievtiń týǵan-týystary men jaqyndaryna kóńil aitady, dep habarlaidy vedomstvonyń baspasóz qyzmeti.
Osydan eki kún buryn 5 kiik atqan brakonerlermen qaqtyǵysta aýyr jaraqat alǵan «Ohotzooprom» ÓB» RMQK inspektory Erlan Nurǵaliev búgin tańerteń qaitys bolǵan edi.
«E.Nurǵaliev qazaq dalasynyń simvoly aqbókenderdi jáne kórkem tabiǵatymyzdy qorǵaýda óziniń qyzmettik mindetin adal oryndaý kezinde qaza tapty. Qazaqstan Respýblikasynyń Aýyl sharýashylyǵy ministrligi Erlan Nurǵalievtiń týǵan-týystary men jaqyndarynyń qaiǵysyna ortaqtasyp, kóńil aitady» delingen habarlamada.
Eske salsaq, ol Qaraǵandy oblysynyń Nura aýdanynda sirek kezdesetin jáne joiylyp ketý qaýpi tóngen jabaiy ańdar men aqbókenderdi qorǵaý kezinde brakonerlerdiń qolynan aýyr jaraqat alǵan bolatyn.
Ol bir táýlikten astam ýaqyt Astana qalasyndaǵy №1 aýrýhananyń qarqyndy terapiia bóliminde ómir úshin arpalysty.
Nurǵaliev Erlan Balǵabekovich 1966 jyly Aqmola oblysynda dúniege kelgen. Bilimi - dene shynyqtyrý jáne áskeri daiyndyq oqytýshysy. 2012 jylǵy naýryzdan bastap «Ohotzooprom» ÓB» RMQK Qaraǵandy tirek pýnktinde Ortalyq aimaqtyq filialdyń inspektory qyzmetin atqardy.
