- Memlekettik organdardyń birinshi basshylary qyzmetin baǵalaý úshin kadrlar aýyspalyǵy sekildi indikatordy qosý kerek. Bul týraly búgin QR Parlamenti Májilisiniń jalpy otyrysynda QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Qairat Qojamjarov aitty, dep habarlaidy Ult.kz tilshisi QazAqparat agenttigine silteme jasap.
«Búginde konkýrstan tys taǵaiyndaýlar 25 ese siregenin baiqap otyrmyz. Birinshi basshylardy baǵalaý úshin belgili bir ólshem bar. Osy rette belgilengen shekti buzý kórsetkishi azaiǵany kórinýde. Degenmen, ortalyq organdarda, sondai-aq jergilikti jerlerde basshylar aýysqan oryndarda kadrlardyń da ketetindigin baiqadyq. Bul turǵyda túrli sebepter kórsetiledi, iaǵni óz erkimen jumystan ketý, basqa qyzmetke aýysý jáne basqa da jaǵdailar tirkeledi. Alaida, bul máselede tereńde jatqan jasyryn sebepter bar ekenin túsinemiz. Zańnamaǵa sáikes, bizge tiisti aryz túsken kezde ǵana agenttik osyndai jaǵdailarǵa aralasýǵa quqyly. Biraq, aǵymdaǵy jyly bundai jaǵdai bolǵan joq», - dedi Qojamjarov depýtattyń saýalyna jaýap berip turyp.
Onyń sózine qaraǵanda, sondyqtan da memlekettik organdardyń birinshi basshylary qyzmetin baǵalaý týraly kelisimine kadrlar aýyspalyǵy sekildi indikatordy qosý máselesi qaralýda.
«Ekinshiden, bizde osyndai basshylardy jaýapqa tartý boiynsha ákimshilik zańnamany qoldaný turǵysynda ókilettik bar. Jalpy, osy máselemen júieli túrde ainalysamyz»,-dep túiindedi sózin agenttik basshysy.
.jpeg)