Tanymal ánshi Erdos Qanaev áleýmettik jelide óziniń syrt kelbetine qatysty pikir bildirgen oqyrmandaryna jaýap berdi. Óner iesi ómirindegi aýyr sátter týraly da ashyq jazdy, dep habarlaidy ult.kz.
Ánshiniń aitýynsha, buǵan deiin jariialaǵan videosynyń astynda keibir jeli qoldanýshylary onyń qatty ózgergenin aityp, «Qartaiyp ketipsiz», «Bul da qartaiypty» degen pikirler qaldyrǵan.
Erdos Qanaev mundai ózgeristiń artynda adamnyń basynan ótken aýyr synaqtar men joǵaltýlar turýy múmkin ekenin jetkizdi.
«Úmit etken balań 10 jasynda baqilyq bolsa, artynan asqar taý ákeń o dúnielik bolsa, qartaiasyń. Kóz ilespes shapshańdyqpen qartaiady ekensiń», – dep jazdy ánshi.
Sonymen qatar ol adamnyń syrtqy kelbetine qarap, onyń jan dúniesinde ne bolyp jatqanyn ańǵarý árdaiym múmkin emes ekenin aitty.
«Kúlip júrgen adamnyń bári baqytty emes, túsingenim!» – dedi Erdos Qanaev.
Ánshiniń bul jazbasy jelidegi syrt kelbetke qatysty pikirlerge jaýabymen qatar, adamdy syrtqy beinesine qarap baǵalamaýǵa shaqyrǵan oiymen de kópshilik nazaryn aýdardy.
