Senattaǵy parlamenttik tyńdaýda depýtat Muhtar Jumaǵaziev jeke kóterme-taratý ortalyqtary óz jumysy barysynda birqatar qiynshylyqtarǵa tap bolǵanyn aitty, dep habarlaidy QazAqparat.
«Agrarlyq sektordyń basty maqsatyn aitatyn bolsaq, ol- memlekettiń azyq-túlik qaýipsizdigin qamtamasyz etý. Qazirgi pandemiia kezinde álemde azyq-túlik infliatsiiasynyń ósýi bizdiń elge de áserin tigizdi. Máselen, biylǵy jylǵy qazan aiynyń qorytyndysy boiynsha jyldyq infliatsiia 8,9%-dy qurady. Bul rette baǵanyń jyldyq ósýine salymnyń jartysynan kóbin azyq-túlik infliatsiiasy qurady. Baǵanyń turaqty ósýi men infliatsiialyq kútýlerdiń joǵary bolýyna bailanysty Prezident azyq-túlik taýarlarynyń tiimdi baǵasyn qalyptastyrý men bólýdi qamtamasyz etýdi tapsyrdy. Bul rette aýylsharýashylyq taýar óndirýshileriniń óz ónimderin satý baǵasyna aitarlyqtai áser ete almaityndyǵyn jáne kóbinese satyp alý uiymdarynyń baǵalaryn qabyldaýǵa májbúr bolatyndyǵyn atap ótken jón», - dedi M. Jumaǵaziev «Aýyl sharýashylyǵyn damytýdyń ózekti máseleleri men perspektivalary» taqyrybyna arnalǵan parlamenttik tyńdaýda.
Onyń paiymynsha, osylaisha, aýylsharýashylyq ónimderiniń baǵasy ósýiniń sebepteri shaǵyn jáne aýyl sharýashylyǵynyń barlyq óniminiń 41,5%-yn qamtamasyz etetin jeke qosalqy sharýashylyqtardyń óz ónimderiniń satý múmkindikteriniń shekteýlýimen qosa, ónimder saýda oryndaryna deldaldar arqyly ótýinde.
«Memlekettik organdar bul máseleni kóterme-taratý ortalyqtaryn salý arqyly sheshiletine senimdi, alaida qazirdiń ózinde óńirlerde qyzmet kórsetip otyrǵan birneshe jeke kóterme-taratý ortalyqtary óz jumysy barysynda birqatar qiynshylyqtar keshýde», - dedi senator.
Osy oraida ol kóterme-taratý ortalyqtarynyń mártebesi jáne onyń qyzmetine qatysty normativtik quqyqtyq bazanyń joqtyǵy, memlekettik ári jergilikti atqarýshy organdary, aýylsharýashylyq taýar óndirýshileri jáne jeke qosalqy sharýashylyqtary arasynda ózara is-qimyldyń bolmaýy máselesin atady.
«Óndirýshilerden ortalyqtarǵa deiingi tizbektiń ár býyny boiynsha ónimdi jetkizý tetigi pysyqtalmaýy syndy basqa da máseleleri joq emes», - dedi depýtat.
Osyǵan bailanysty zańnamalyq bazany jetildirý maqsatynda tiisti usynystar jasaldy:
- «Kóterme-taratý ortalyqtarynyń qurylysy» jobasynyń pasportyna ǵimarat qurylysy men jabdyq satyp alý qunynan investitsiialyq salymdardy óteýdi 25% sýbsidiialaýdy engizý;
- Mindettemeler bóliginde agroónerkásiptik keshenin sýbsidiialaý qaǵidalary týraly Aýyl sharýashylyq ministriniń buiryǵyna ózgerister engizý nemese sýbsidiialanǵan sharýalar óndirgen ónimniń belgili bir kólemin kóterme-taratý ortalyqtaryna jetkizýdi mindetteý;
- Elde óndiriletin aýyl sharýashylyǵy taýarlarynyń bir tizbesi boiynsha taýar ótkizý júiesine qatysýshylarǵa qosylǵan qun salyǵynan bosatý túrindegi yntalandyrý sharalaryn engizý.
- Aýylsharýashylyq taýar óndirýshilerimen ortalyqtardyń arasynda forvardtyq kelisim-sharttarmen satyp alý tetigin pysyqtaý men ainalym qarajat bólýdi qarastyrý.
