© Photo: SS0 / edar
«Atameken» UKP sarapshylary QQS mólsherlemesin 12%-dan 16%-ǵa deiin arttyrý týraly aqparatqa qatysty pikir bildirdi, dep habarlaidy "Ult aqparat".
Ulttyq palata basqarma tóraǵasynyń orynbasary jáne «Atameken» UKP jańa salyq kodeksiniń jobasyna usynystar ázirleý jónindegi jumys tobynyń basshysy Timýr Jarkenovtyń aitýynsha, «Atameken» biznes-qoǵamdastyqtyń basym bóligimen birlesip, QQS mólsherlemesin kóterýge úzildi-kesildi qarsy. Bul shara taýarlar baǵasynyń kúrt ósýine, infliatsiiaǵa jáne shaǵyn biznestiń ortasha, al ortasha biznestiń irige ainalýyna jol bermeidi.
«QQS mólsherlemesin ósirýge bolmaidy. Ashyq jumys istegen kásipkerler ári qarai da ashyq jumys isteýge májbúr bolady. Al kóleńkede jumys istegender sol jerde qalyp qoiady. Ortada turǵandar sur aimaqty tańdaidy. Osylaisha Prezidenttiń shaǵyn biznestiń orta bizneske ainalýyna qatysty tapsyrmasy oryndalmai qalady», – dedi UKP ókili.
Eske salsaq, jańa Salyq kodeksi jobasyn ázirleý sheńberinde Ulttyq ekonomika ministrligi QQS mólsherlemesin 12%-dan 16%-ǵa deiin kóterýdi usyndy.
Ministrliktiń ókilderi usynylyp otyrǵan mólsherlemeniń ulǵaiýy biýdjetke qosymsha túsimder ákeledi, sondai-aq kórshi elderden ákelinetin taýarlarmen salystyrǵanda otandyq taýarlardyń básekege qabilettiligin arttyrady dep sanaidy. Bul mólsherleme 2025 jyldan bastap qoldanylady dep kútilýde.
Bul rette biznes-qoǵamdastyq atalǵan tujyrymmen kelispeidi. Buǵan qatysty óz pikirin kásipker, Ýchet.kz quryltaishysy Maksim Baryshev aitty.
«Buǵan jol bermeý kerek. Bul shara ósýge emes, Qazaqstan Respýblikasyndaǵy búkil kásipkerliktiń quldyraýyna ákeledi. Onyń ústine qosymsha qun salyǵynyń mólsherlemesin osylai tez ózgertýge bolmaidy. Óitkeni 2025 jylǵa bir jyl ǵana qaldy», – dedi Maksim Baryshev.
Búginde Qazaqstanda QQS mólsherlemesi 12 paiyzdy quraidy. Bul kórsetkish Resei, Belarýs, Armeniiamen salystyrǵanda tómen. Bul elderde salyq mólsherlemesi 20 paiyzǵa teń.
Aita keteiik, Salyq kodeksiniń jobasyn 2024 jyldyń birinshi toqsanynda Parlament qaraýyna jiberý josparlanǵan.
