Búgin Qostanaida 120 páterdiń kilti tapsyryldy. Bul maqsatta birden eki úi paidalanýǵa berilip otyr. Nysandar «Nurly jer» baǵdarlamasynyń aiasynda salynǵan. Páterlerdiń jartysy, iaǵni elý paiyzy Turǵyn úi qurylys jinaq banki salymshylarynyń arasynda bólistirildi, al qalǵan 50%-y ákimdikte úi kezeginde turǵan adamdarǵa berildi, dep habarlaidy Ult.kz tilshisi.
Bir bólmeli páterdiń kiltin alyp, qonys toiyn toilaǵandardyń biri – 24 jastaǵy Ǵaziza Kópjasarova. Ǵaziza Qostanai oblysy, Meńdiqara aýdany, Krasnaia Presnia aýylynda turady. Meńdiqara aýdandyq ortalyq aýrýhanasynda (KMK) feldsher bolyp jumys isteidi. Ol Turǵyn úi qurylys jinaq bankindegi esepshotyn 2014 jyly qazan aiynda ashqan eken. Osy ýaqyttyń ishinde Ǵaziza 1 bólmeli páterdiń 30%-yn, iaǵni, 1 600 000 teńgesin jinap, jańa páter iesi atanyp otyr.
- 2014 jyly jumysqa turyp, belgili bir tabysym bolǵan soń týys ápkelerim, apalarym Turǵyn úi qurylys jinaq bankinen esepshot ash dep keńes berdi. Alǵashynda ai saiyn esepshotyma 25 000 teńgeden salyp otyrdym. Eki jyldan keiin jalaqym kóterildi. Sosyn 40 000 teńgeden sala bastadym, - deidi ol.
Jas mamannyń aitýynsha, ol ai saiyn aqsha salyp turýdyń arqasynda baspanaly bola alatynyn jete túsingen.
- 3 jyldyń ishinde bir bólmeli páter baǵasynyń 30%-yn jinap qoidym. Tiisti qadamdardyń bárin oryndaǵan soń internet arqyly baiqaý nátijesin qadaǵalap otyrdym. Maqsatym aiqyn bolǵandyqtan, nátijeni kórgende qatty tańǵalǵan joqpyn. Biraq, árine óte qýandym. Jas bolǵan soń qalada turǵym, jumys istegim keletin. Mine, búgin sol armanym oryndalyp jatyr. Onyń ústine jańa páterdiń ornalasqan jeri de kóńilimnen shyqty. Qazir aýylda anam, inim jáne sińlim tórteýmiz turamyz. Ázirshe, qalaǵa jalǵyz kóship baramyn. Inim men sińlim oqýyn bitirgen soń meniń janyma keledi, – deidi Ǵaziza Kópjasarova.
Ǵazizanyń páter nesiesi boiynsha ai saiynǵy tólemi 37 000 teńgeni quraidy. Ol bul qarjyny 8 jyl tólemek. Páter iesiniń oiynsha, bul asa qiyndyq týǵyzbaidy.
- Men páter boiynsha berilgen nesieni tólei almai qalamyn dep qoryqpaimyn. Jańa baspanany óz kúshime sengendikten aldym emes pe! Bastysy, endi men qalada, óz úiimde turamyn. Sol úshin ózimdi baqytty sezinemin, – deidi Ǵaziza Kópjasarova.
Turǵyn úi qurylys jinaq banki oblystyq filialynyń direktory Dáýren Saýdabaevtyń aitýynsha, paidalanýǵa berilgen páterlerdiń 1 sharshy metriniń baǵasy – 136 000 teńge. Nysandardaǵy bir bólmeli páterdiń baǵasy orta eseppen 5,5 mln teńgeniń ainalasynda eken.
- Jańa úidiń iesi bolyp otyrǵan bul azamattar birneshe jyl boiy turaqty túrde Turǵyn úi qurylys jinaq bankindegi shottaryna tabysynyń bir bóligin salyp turdy. Al búgin úmitteri aqtalyp otyr. Aqshanyń bir bóligin salymshylardyń ózderi jinaǵanyn atai ketý kerek. Jetpeitin somany bank jyldyq mólsherlemesi 5% bolatyn nesie túrinde berdi, - deidi ol.
Búgingi kúni Qostanai oblysynyń 43 000 turǵyny Turǵyn úi qurylys jinaq bankinde úi alamyz dep aqsha jinap jatyr. Qazir olar 1 sharshy metriniń baǵasy 128 000 teńge bolatyn quny tómendetilgen úi alý múmkindigin de paidalana alady. TÚQJB 9 úidegi 400 páter boiynsha úmitkerlerdiń qosymsha tobyn qabyldaýda. Nysandar týraly tolyq aqparatty baspana.kz portalynan bilýge bolady.
