Qostanaida jasyryn jumys istep kelgen eki kazino anyqtaldy, dep habarlaidy "Ult aqparat".
«QR Qarjy ministrligi Qarjy monitoringi komitetiniń Qostanai oblysy boiynsha Ekonomikalyq tergeý departamenti qyzmetkerleri arnaiy maqsattaǵy «Qyran» bólimshesimen birlese otyryp, Qostanai qalasynda eki jasyryn kazinonyń qyzmetin toqtatty. Túrli qumar oiyndardy uiymdastyrý jáne ótkizý úshin is figýranttary qala aýmaǵynda arnaiy oryndardy jalǵa alǵan. Kazino uiymdastyrýshylary oiynǵa 10 000 teńgeden kem emes somaǵa fishkalar satyp alǵan oiynshylardy ǵana qatystyrǵan», delingen vedomstvo habarlamasynda.
Tekserý barysynda pokerge jáne taǵy 6 qumar oiynyna arnalǵan ústel, kartalardyń 15 danasy, fishkalar, beinejazbalary bar resiver, oiynǵa tigilgen mólsherlemeler týraly jazbalary bar jýrnal men bloknot, oiyn fishkalary bar keis, «Samsung» markasyndaǵy elektrondy planshet jáne aqshalai qarajat anyqtalyp, tárkilendi.
Qazirgi tańda tergeý amaldary júrgizilýde.
