Foto: Pexels.com
Qostanai qalasynyń turǵyny litsenziiasy joq salonda kosmetologiialyq qyzmet alyp, ýáde etilgen nátijege qol jetkizbegen soń, 1,2 mln teńgesin qaitaryp aldy, dep habarlaidy Ult.kz.
Oqiǵa 2025 jyldyń jazynda bolǵan. Turǵyn konsýltativtik-diagnostikalyq jáne dermatokosmetologiialyq qyzmetke 1 200 000 teńge tólegen. Alaida nátije kóńilinen shyqpaǵandyqtan, salon ákimshiliginen kelisimdi buzýdy jáne aqshany tolyq qaitarýdy talap etken. Biraq salon tutynýshynyń talabyna jaýap bermegen.
Tutynýshy Tutynýshylar quqyǵyn qorǵaý jáne saýda departamentine júgingennen keiin ǵana tekserý júrgizildi. Departament salonnyń talap aryzǵa jaýap bermegenin anyqtap, kásipkerdi ákimshilik jaýapkershilikke tartty. Sondai-aq kelisimsharttaǵy tutynýshylar quqyǵyn shekteitin talaptardy alyp tastaý jóninde nusqama berildi.
Sot protsesi kezinde salon dermatokosmetologiialyq protsedýralardy litsenziiasyz, iaǵni meditsinalyq ruqsatsyz kórsetkeni belgili boldy. Sot salondy tutynýshyǵa barlyq tólengen somany – 1,2 mln teńgeni qaitarýǵa mindettedi.
«Bul jaǵdai kásipkerlerdiń zańdy buljytpai oryndaýy qajet ekenin dáleldeidi. Árbir turǵyn sapaly jáne qaýipsiz qyzmet alýǵa quqyly. Departament azamattardyń quqyqtaryn qorǵaýdy ári qarai da jalǵastyrady», – dedi Qostanai oblysy boiynsha saýda jáne tutynýshylar quqyǵyn qorǵaý departamenti basshysynyń mindetin atqarýshy Q. Ákijanov.
Biyl departamentke barlyǵy 1452 ótinish túsken. Onyń ishinde 717-si – jazbasha, 106-sy – Telegram-bot arqyly, 269-y – jedel jelige kelip túsken qońyraýlar. Taǵy 360 azamat jeke qabyldaýda keńes alǵan. Tutynýshylarǵa 62,7 mln teńgeden astam qarajat qaitarylǵan.
Memlekettik baqylaý aiasynda 73 tekserý júrgizilip, jospardan tys tekserýler nátijesinde 16 kásipkerge eskertý berilip, 44 kásipkerge jalpy 1 397 000 teńge kóleminde aiyppul salynǵan.
