Byltyr Qostanai qalasy ákimdiginiń jumyspen qamtý bólimine 7 165 adam júgingen. Bul týraly búgin qala ákimi Bazyl Jaqypov turǵyndarǵa esep berý kezdesýinde aitty. Bul týraly QazAqparat habarlady.
2017 jyly «Kásipkerlikti qoldaý kartasy» boiynsha qalada 7 investitsiialyq joba júzege asyrylǵan. Bul jobalarǵa 13 mlrd teńge jumsaldy. Munyń syrtynda 308 shaǵyn nysan paidalanýǵa berilip, barlyǵy 570 jańa jumys orny ashyldy. Alaida, qaladaǵy jumyssyzdyq kórsetkishi áli de tómender emes.
«Byltyr ákimdiktiń jumyspen qamtý bólimine 7 165 adam jumys surap kelgen. Jalpy, qalada 5 895 adam jumyssyzdar sanatyna kiredi. Turǵyndarǵa áleýmettik qoldaý kórsetý boiynsha jańa jumys oryndaryn ashý kózdelgen. Biyl taǵy 6 iri investitsiialyq joba qolǵa alynbaq. Bul tusta jeke investorlardyń kómegi zor. Máselen, byltyr «Mart» saýda ortalyǵynyń qasynan salynǵan «McDonald's» meiramhanasy 100 qostanailyqty jumysqa aldy. Kásipker óz qaltasynan 800 mln teńgege jýyq qarjy shyǵardy», - dedi qala ákimi.
Bazyl Jaqypovtyń aitýynsha, nátijeli jumyspen qamtý baǵdarlamasy aiasynda 1 370 turǵyn turaqty jumys tapty. Munyń syrtynda, 338 otbasyǵa áleýmettik kómek usynyldy. Buǵan biýdjetten 26 mln teńge qarastyryldy.
«Qalada 6 889 múmkindigi shekteýli jan turady. Olardyń shipajaida em alýyna jaǵdai jasalynyp keledi. Aldaǵy ýaqytta invataksilerdi tsifrlandyrý boiynsha birneshe jobany iske asyrmaqpyz. Atap aitqanda, qamkóńil jandar úshin mobildi qosymsha jasalynyp jatyr. Olar qaldaǵy invataksilerdiń baǵytyn smartfondar arqyly baqylap, shaqyra alady. Qalada invataksi qyzmetine 600 adam júginedi», - deidi Jaqypov.
Qala ákimi aitqandai, Uly Otan soǵysy ardagerleri de áleýmettik kómekterden tys qalmaidy. Búginde qaladaǵy 982 soǵys ardagerine ai saiyn turmystyq tehnikalarǵa sertifikattar berilip otyrady. 2017 jyly bul sharaǵa 92 mln teńge bólingen.
