Foto: ashyq derekkóz
Qostanai oblysyndaǵy jylý jelilerin rekonstrýktsiialaýdy aiaqtaýǵa Úkimet rezervinen shamamen 2,2 mlrd teńge bólindi. Tiisti Qaýlyǵa Premer-ministr Oljas Bektenov qol qoidy, dep habarlaidy Ult.kz.
Qarajat Qostanai, Jitiqara, Arqalyq qalalaryn jylýmen jabdyqtaý jáne Rýdnyidy sýmen jabdyqtaý nysandaryn jóndeýge baǵyttaldy.
Qostanai qalasynyń JEO bas bý qubyryn rekonstrýktsiialaýǵa 188 mln teńge baǵyttaldy. Bul nysan 1955 jyly paidalanýǵa berilgen.
Bý qubyryna sońǵy ishinara jóndeý 2012 jyly júrgizilgen. Jańǵyrtý qysqy kezeńde JEO jumysynyń senimdiligin arttyrýǵa múmkindik beredi.
Jitiqara qalasynda 11 shaǵyn aýdanda jylý jelilerin jóndeýge 389 mln teńge bólindi, onyń 269 mln teńgesi Y. Altynsarin kóshesi jáne 205 mln-y Jibek Joly kóshesi boiynsha. Bul jylý jelileri 183 kóppáterli úi, 2,5 myń az qabatty úimen qatar, qala qurylysynyń edáýir massivterin qamtidy. Jylý energiiasyn tutynýshylardyń jalpy sany 15,5 myń abonentti quraidy.
Jalpy, qalanyń jylý jelileriniń uzyndyǵy 78 shaqyrym, onyń ishinde magistraldyq jelileri – 7,53 shaqyrym.
Sondai-aq jumystar Arqalyq qalasynda da júrgizilýde, onda jylý jelilerin rekonstrýktsiialaý boiynsha jobanyń úshinshi kezegin júzege asyrýǵa shamamen 645 mln teńge baǵyttaldy. 2025 jylǵa esepteýlerge sáikes jalpy uzyndyǵy 10 shaqyrym bolatyn 1,6 shaqyrym jelini jańartý josparlanýda. Bul jelige jalpy bilim beretin mekteppen qatar 300 abonent qosylǵan.
Rýdnyi qalasynyń sýmen jabdyqtaý júiesin rekonstrýktsiialaý jobasy 500 mln teńgege qarjylandyryldy. Atap aitqanda, qarajat 1978 jyly paidalanýǵa berilgen qalanyń №2 súzgi stansasyn jańǵyrtýǵa jumsalady. Joba Rýdnyi qalasyn, Qashar jáne Gorniatsk kentterin, sondai-aq ónerkásiptik nysandardy — barlyǵy 122 myńnan astam adamdy úzdiksiz jáne sapaly sýmen jabdyqtaýdy, sondai-aq jylytý maýsymynyń apatsyz ótýin qamtamasyz etedi.
Úkimet qabyldaǵan jańǵyrtý sharalary óńirdegi injenerlik infraqurylymdy edáýir nyǵaitýǵa, jylý jáne sýmen jabdyqtaý nysandarynyń senimdiligi men tiimdiligin arttyrýǵa, shyǵyndardy azaitýǵa, turǵyndar men áleýmettik mańyzy bar nysandardy jylýmen jáne sýmen qamtamasyz etýge múmkindik beredi.
