Foto: ashyq derekkóz
Qostanai oblysynyń densaýlyq saqtaý salasynda anyqtalǵan qarjylyq zańbuzýshylyqtardyń jalpy somasy 2 milliard teńgeden asty. Bul týraly oblystyq prokýratýra málimdedi, dep habarlaidy Ult.kz.
Qadaǵalaý organynyń aqparatynsha, sybailas jemqorlyqqa negizdelgen qylmystyq shema meditsinalyq uiymdardyń qajetsiz jabdyqtardy negizsiz joǵary baǵamen satyp alýymen bailanysty bolǵan. Korrýptsiialyq sipattaǵy memlekettik satyp alýlar saldarynan memlekettik biýdjetke iri kólemde zalal keltirilip, onyń jalpy somasy 2 mlrd teńgeden asqan.
Atalǵan derekter boiynsha Qostanai oblysynyń prokýratýra organdary qylmystyq ister tirkegen.
Buǵan deiin Qostanai oblystyq densaýlyq saqtaý basqarmasynyń burynǵy basshysy Daniiar Jandaevtyń, Qarasý aýdandyq aýrýhanasynyń bas dárigeri Vladimir Golýbevtiń jáne oblystyq densaýlyq saqtaý basqarmasy basshysynyń eks-orynbasary Erbolat Dospanovtyń ustalyp, qamaýǵa alynǵany jóninde habarlaǵan edi.
Sonymen qatar memlekettik satyp alý konkýrstaryn jeńip alyp, aýrýhanalar men klinikalarǵa jabdyqtardy qymbat baǵamen jetkizgen merdigerdiń de ustalǵany belgili boldy.
Tergeý aiasynda ózge de tulǵalar, onyń ishinde birqatar meditsinalyq uiymdardyń basshylary qylmystyq jaýapkershilikke tartylǵan. Alaida tergeý barysyna qatysty ózge málimetter QR Qylmystyq-protsestik kodeksiniń 201-babyna sáikes jariia etilmei otyr.
