Foto: polisia.kz
Qostanai oblysynda alaiaqtarǵa jumys istegen jastar áshkerelendi, dep habarlaidy Ult.kz Polisia.kz-ke silteme jasap.
Politseiler internet-alaiaqtarǵa kómektesip júrgen 16 jasóspirimdi ustady. Olardyń biri — Lisakov qalasynyń 18 jastaǵy turǵyny, jańa SIM-kartalardyń jetkizýshisi bolyp shyqty. Keiin osy nómirler áleýmettik jeliler men messendjerlerde jalǵan akkaýnttar ashýǵa paidalanylǵan. Tintý barysynda onyń úiinen 21 telefon, túrli operatorlardyń 48 SIM-kartasy jáne modem tárkilendi. Munyń bári qazaqstandyqtardy aldaý úshin qylmystyq shemalarda qoldanylǵan.
Almaty, Astana, Aqtóbe, Qostanai jáne Semei qalalarynyń turǵyndary zardap shekken bes qylmystyq is boiynsha keltirilgen shyǵyn 80 million teńgeden asty. Azamattar nómirlerdiń jalǵan tulǵalarǵa tirkelgenin bilmese de, aqsha aýdaryp otyrǵan. Tergeý barysynda politsiia 17–20 jas aralyǵyndaǵy taǵy 15 jasóspirimniń osyndai zańsyz áreketterge tartylǵanyn anyqtady.
Kámeletke tolmaǵandardyń qylmysqa qatysqany úshin tek ózderi ǵana emes, ata-analary da qoldanystaǵy zańnamaǵa sáikes jaýapqa tartylady. Quqyq qorǵaýshylar jastardyń qylmystyq shemalarǵa tartylýyna jol bermeý úshin bilim basqarmasymen birlesken profilaktikalyq is-sharalardy bastady. Sonymen qatar politsiia Qylmystyq kodekske engizilgen sońǵy túzetýlerdi eske saldy. Máselen, endi alaiaqtarǵa jeke derekterin nemese SIM-kartalaryn beretin dropperlerge 7 jylǵa deiin bas bostandyǵynan aiyrý jazasy qarastyrylǵan.
