Qostanailyq politseiler Tobyl qalasynda bolǵan jantúrshigerlik jol apatynyń jai-japsaryn aitty, - dep habarlaidy Tengrinews.kz tilshisi.
Áleýmettik jelide taraǵan jantúrshigerlik kadrlar keshe keshkisin Qostanai oblysyndaǵy Tobyl qalasynda bolǵan. Málimet boiynsha kóshede úsh kólik soqtyǵysyp, jaiaý ketip bara jatqan adamdy soqqan.
"Hyundai Accent kóligin tizgindegen 20 jastaǵy azamat 56 jastaǵy júrgizýshi mingen Renault Logan avtokóligimen soǵylǵan. Al eki kóliktiń birine soǵylǵan Skoda Yeti qatty ekpinmen trotýardaǵy jaiaý adamdy qaqqan. Qatty soqqydan 25 jastaǵy jigit qaza tapty", - dedi PD baspasóz qyzmetindegiler.
Júrgizýshiler men jolaýshylar túrli jaraqatpen oblystyq aýrýhanaǵa jetkizilgen. Qazir sotqa deiingi tergeý bastaldy.
