Qostanaida jol erejesin óreskel buzyp, qoldan jasalǵan saqtandyrý polisimen kólik júrgizgen Resei azamaty ustaldy. Tártip buzýshynyń kóligi aiyp turaǵyna qoiyldy, dep habarlaidy "Ult aqparat" oblystyq politsiia departamentiniń baspasóz qyzmetine silteme jasap.
Tártip buzýshy 2021 jyldyń 10 aqpanynda ustaldy. Patrýldik politsiia qyzmetkerleri Arman Bektursynov pen Ádil Jaqypov Resei Federatsiiasynyń 29 jastaǵy azamaty mingen «FORD Gelaksi» markaly avtokóligin toqtatady. Avtomatty tirkeý quraldarynyń kómegimen 2020 jylǵy 20 maýsym men 2021 jylǵy 10 aqpan aralyǵynda atalmysh kólik iesiniń 184 ret jol erejesin buzǵany anyqtaldy. Aiyppul kólemi 3,5 mln teńgeden asyp ketken.
«Júrgizýshi jalǵan saqtandyrý polisimen kólik quralyn basqarǵan. Avtokólik Qostanai qalasy ákimdiginiń mamandandyrylǵan turaǵyna ornalastyryldy, quqyq buzýshyǵa salynǵan aiyppuldardy tóleý qajettiligi týraly habarlama berildi. Júrgizýshi QR ÁQBtK-niń 230-baby boiynsha ákimshilik jaýapkershilikke tartyldy, jalǵan saqtandyrý polisin paidalanǵany úshin material jinaldy», delingen politsiia aqparatynda.
2021 jyldyń qańtarynda «Avtoýragan» qurylǵysy arqyly shetel kólikterine qatysty 1676 ereje buzý deregi tirkelgen. Aiyppul somasy – 10 mln 209 myń teńge. Qazir kólik ielerine 700 nusqama jiberildi.
