قوستانايدا جول ەرەجەسٸن ٶرەسكەل بۇزىپ, قولدان جاسالعان ساقتاندىرۋ پوليسٸمەن كٶلٸك جٷرگٸزگەن رەسەي ازاماتى ۇستالدى. تەرتٸپ بۇزۋشىنىڭ كٶلٸگٸ ايىپ تۇراعىنا قويىلدى, دەپ حابارلايدى "ۇلت اقپارات" وبلىستىق پوليتسييا دەپارتامەنتٸنٸڭ باسپاسٶز قىزمەتٸنە سٸلتەمە جاساپ.
تەرتٸپ بۇزۋشى 2021 جىلدىڭ 10 اقپانىندا ۇستالدى. پاترۋلدٸك پوليتسييا قىزمەتكەرلەرٸ ارمان بەكتۇرسىنوۆ پەن ەدٸل جاقىپوۆ رەسەي فەدەراتسيياسىنىڭ 29 جاستاعى ازاماتى مٸنگەن «FORD گەلاكسي» ماركالى اۆتوكٶلٸگٸن توقتاتادى. اۆتوماتتى تٸركەۋ قۇرالدارىنىڭ كٶمەگٸمەن 2020 جىلعى 20 ماۋسىم مەن 2021 جىلعى 10 اقپان ارالىعىندا اتالمىش كٶلٸك يەسٸنٸڭ 184 رەت جول ەرەجەسٸن بۇزعانى انىقتالدى. ايىپپۇل كٶلەمٸ 3,5 ملن تەڭگەدەن اسىپ كەتكەن.
«جٷرگٸزۋشٸ جالعان ساقتاندىرۋ پوليسٸمەن كٶلٸك قۇرالىن باسقارعان. اۆتوكٶلٸك قوستاناي قالاسى ەكٸمدٸگٸنٸڭ مامانداندىرىلعان تۇراعىنا ورنالاستىرىلدى, قۇقىق بۇزۋشىعا سالىنعان ايىپپۇلداردى تٶلەۋ قاجەتتٸلٸگٸ تۋرالى حابارلاما بەرٸلدٸ. جٷرگٸزۋشٸ قر ەقبتك-نٸڭ 230-بابى بويىنشا ەكٸمشٸلٸك جاۋاپكەرشٸلٸككە تارتىلدى, جالعان ساقتاندىرۋ پوليسٸن پايدالانعانى ٷشٸن ماتەريال جينالدى», دەلٸنگەن پوليتسييا اقپاراتىندا.
2021 جىلدىڭ قاڭتارىندا «اۆتوۋراگان» قۇرىلعىسى ارقىلى شەتەل كٶلٸكتەرٸنە قاتىستى 1676 ەرەجە بۇزۋ دەرەگٸ تٸركەلگەن. ايىپپۇل سوماسى – 10 ملن 209 مىڭ تەڭگە. قازٸر كٶلٸك يەلەرٸنە 700 نۇسقاما جٸبەرٸلدٸ.
