Qostanai oblysynyń memlekettik sanitariialyq bas dárigeri E.Daýletbaev karantindik sharalardy kezeń-kezeńimen jeńildetý týraly qaýly qabyldady, dep habarlaidy oblys ákimdigi janyndaǵy jedel shtab.
Qaýlyǵa sáikes 2021 jylǵy 8 aqpannan bastap Qostanai oblysyndaǵy memlekettik shekaralarda sanitariialyq beketter ornatylady. Sonymen qatar qalaaralyq, oblysishilik avtobýstardyń emin-erkin qozǵalýyna ruqsat berildi. Bul rette kólik oryndarynyń 75%-y ǵana tolýy tiis, jolaýshylar qoǵamdyq kólikke maskasyz otyrǵyzylmaidy. Qaladaǵy qoǵamdyq kólikterdiń jumysy saǵat 06:00-den 23:00-ge deiin belgilendi. Kólikter dezinfektsiialyq quraldarmen mindetti túrde óńdelýi tiis. Sondai-aq jeksenbi kúnderi avtobýstardyń jumysy toqtaidy.
«Taksi júrgizýshisi men jolaýshylary mindetti túrde betperde kiiýi kerek. Azyq-túlik satyp alý úshin dúkenderge, dárihanalarǵa, emdeý uiymdaryna shyǵýdy, qoqysty shyǵarýdy, janýarlardy serýendetýdi, sailaý ýchaskelerine barýdy jáne t. b. qospaǵanda, Qostanai oblysynyń eldi mekenderiniń aýmaǵy boiynsha 65 jastan asqan azamattardyń júrip-turýy shekteledi. Oiyn-saýyq, sporttyq is-sharalardy, kórmelerdi, forýmdardy, konferentsiialardy, sondai-aq otbasylyq, estelik is-sharalardy (banketter, úilený toilary, mereitoilar, eske alý), onyń ishinde úide jáne adamdar kóp jinalatyn ózge de is-sharalardy ótkizýge tyiym salynady. Jappai korporativtik jáne basqa da is-sharalardy ótkizý úshin jeke menshik úiler men qurylystardy jalǵa alýǵa bolmaidy», delingen qaýly mátininde.
Aimaqta karantin sharalary jeńildetilgenimen oiyn-saýyq mekemeleriniń (karaoke, biliard, kalian, kompiýterlik klýbtar, túngi klýbtar, boýling ortalyqtary, jabyq úi-jailardaǵy balalardyń oiyn alańdary men attraktsiondary, batýttar jáne basqalar), kinoteatrlardyń, býkmekerlik keńselerdiń qyzmeti toqtatylady. Fýdkort, banket zaldarynyń qyzmetine tolyq tyiym salyndy. Mádeniet obektileriniń (jeke, toptyq daiyndyqtar), teatrlardyń jumysy ýaqytsha shekteledi. Al kitaphanalardyń, murajailardyń qyzmetine ruqsat berildi. Dini obektilerdiń (meshitter, shirkeýler, soborlar, sinagogalar jáne t. b.) qyzmeti jandanbaq. Alaida ǵimarat ishindegi ashanalar jabyq bolady.
