Qostanai qalasynda 200 oryndyq infektsiialyq aýrýhana paidalanýǵa berildi, dep habarlaidy "Ult aqparat".
Infektsiialyq aýrýhananyń jumysyn oblystyq aýrýhana rettep otyrady. Oblystyq aýrýhananyń bas dárigeri Iýrii Moiseevtyń aitýynsha, nysan zamanaýi joǵary tehnologiialyq qurylǵylarmen jabdyqtalǵan. Statsionar koronavirýs jutyrǵan naýqastardy qabyldaidy jáne qazirdiń ózinde jańa ortalyqqa 40 patsient ornalastyryldy.
«Jańa aýrýhananyń joǵarǵy tehnologiialyq zamanaýi qurylǵylarmen qamtylǵan arnaiy zerthanasy, diagnostika ortalyǵy, ota jasaityn bólimi bar. Infektsiialyq ortalyqtyń basty ereksheligi – munda dárigerler naýqasqa arnaiy qondyrylǵan planshet arqyly qashyqtan baqylaý júrgize alady. Munda naýqastardy ottegimen qamtamasyz etýdiń ortalyqtandyrylǵan júiesi bar. Iaǵni, 8 tonna suiyq ottegi arnaiy tsisternaǵa quiylyp, qajet bolǵan jaǵdaida ár tósekke ornatylǵan qurylǵy arqyly naýqasqa qosylady. Statsionardaǵy qaldyqtardy joiýdyń tiimdi jolyn qarastyrý da eskerilgen. Qaldyqtardy untaqtap, zararsyzdandyryp, qorshaǵan ortaǵa ziian keltirmeýin qamtamasyz etetin arnaiy júie jumys istep tur. Ár palatada 2-3 tósek qoiylǵan. Óte qolaily, jaryq ári jyly. Naýqastar dárethana, arnaiy tazartýdan ótken aýyz sýmen qamtamasyz etilgen. Bul indet juqtyrǵan naýqasqa da, ony emdeitin dárigerge de psihologiialyq turǵydan qolaily jaǵdai týǵyzady», - deidi bas dáriger.
Jańa aýrýhanany dáriger mamandarmen qamtý máselesi de rettelip qoiǵan. Biyl oblysqa ózge óńirlerden 240 dáriger keledi. Aimaqqa jas mamandardy kóptep tartý maqsatynda olarǵa beriletin kóterme aqy kólemi de ósken. Buǵan deiin 1,5 mln teńge kólemindegi kóterme aqy tek aýylǵa baratyn dárigerlerge ǵana berilip kelse, biyldan bastap qalalyq mekenderdegi meditsinalyq mekemelerge jumys isteýge kelgen mamandarǵa da 1 mln teńgeden qoldaý kórsetiledi.
