Torǵai óńirinde sońǵy jyldary buryn-sońdy bolmaǵan damý qarqyny baiqalýda. Bul týraly Qostanai oblysynyń ákimi Qumar Aqsaqalovtyń áleýmettik-ekonomikalyq damý máselelerine arnalǵan brifinginde málim boldy.
Memleket basshysy óz Joldaýynda bul aimaqtyń áleýmettik-ekonomikalyq damýy Úkimettiń erekshe baqylaýynda bolýy tiis ekenin atap ótken bolatyn. Osy tapsyrmaǵa sáikes Arqalyq qalasyn, Amangeldi jáne Jangeldin aýdandaryn aldaǵy úsh jylda keshendi damytýǵa arnalǵan arnaiy jospar ázirlendi.
Jospar tolyq iske asyrylǵan jaǵdaida Torǵai óńirinde birqatar oń ózgerister bolady dep kútilýde. Atap aitqanda, týristik aǵyn aitarlyqtai artyp, mektepke deiingi tárbiemen qamtý deńgeii 90 paiyzdan 100 paiyzǵa jetedi. Sonymen qatar balalardyń qosymsha bilimmen qamtylýy 66 paiyzdan 68 paiyzǵa ósip, buqaralyq sportpen ainalysatyn turǵyndar sany kóbeiedi. Injenerlik infraqurylym jelileriniń tozý deńgeii de edáýir tómendeidi.
Prezidenttiń tapsyrmasymen Arqalyq qalasynda jańa áýejaidyń qurylysy bastaldy. Qazirgi tańda terminal ǵimaratynyń qańqasy turǵyzylyp, injenerlik kommýnikatsiialar tartylǵan, patrýldik joldyń negizi qalanǵan. Joba 2026 jyldyń shilde aiynda tolyq aiaqtalady dep josparlanýda.
Bul nysan tek kólik infraqurylymy emes, Torǵai óńirin eldiń iri ekonomikalyq jáne mádeni ortalyqtarymen bailanystyratyn strategiialyq mańyzy bar joba bolyp tabylady.
Infraqurylymdyq damýdyń taǵy bir mańyzdy baǵyty — avtojol jelisin keńeitý. Aǵymdaǵy jyldyń maýsym aiynda Astana – Janteke – Egindikól – Arqalyq – Torǵai – Yrǵyz baǵyty boiynsha ótetin «Ortalyq – Batys» avtomagistraline resmi bastaý berildi.
Bul jańa kólik dálizi Qostanai, Aqmola jáne Aqtóbe oblystarynyń aýdandary úshin úlken logistikalyq serpin bolmaq. Burynǵy baǵyttarmen salystyrǵanda jol uzyndyǵy 549 shaqyrymǵa qysqarady.
Sonymen qatar Jezqazǵan – Arqalyq – Petropavl avtojolynyń jóndeý jumystary tolyq aiaqtaldy. Nátijesinde Qostanai jáne Aqmola oblystarynyń turǵyndary elimizdiń ońtústik óńirlerine — Shymkent pen Qyzylordaǵa tikelei qatynaý múmkindigine ie boldy. Qyzylorda – Qostanai baǵyty 376 shaqyrymǵa qysqardy, sondai-aq bul jol Reseidiń iri qalalary — Cheliabi, Ekaterinbýrg jáne Ombyǵa tikelei shyǵýdy qamtamasyz etti.
