Qostanai oblysynda brakonerlermen kúres kúsheitilip, mobildi top quryldy, dep habarlaidy "Ult aqparat" oblystyq politsiia departamentiniń baspasóz qyzmetine silteme jasap.
Qostanai óńirinde zańsyz ań aýlaýshylar azaimai tur. Osyǵan bailanysty oblys kóleminde kezekti ret «Kiik» operatsiiasy ótti. Nátijesinde 136 zań buzýshy anyqtalyp, tirkeýge alyndy.
«Qostanai oblysynda brakonerlermen kúres úshin Tabiǵatty qorǵaý oblystyq aýmaqtyq inspektsiiasy men oblystyq politsiia departamenti 8 mobildi top qurdy. Olardyń tórteýi oblys perimetrinde emin-erkin reid atqarady. Qazirge deiin 7 reid sharasy ótkizildi. Zań buzǵan brakonerlerge 1 mln teńgeden astam aiyppul salyndy» delingen baspasóz habarlamasynda.
Qostanai oblysynda kiik sany artyp, 111 myńǵa jetken. Jyldyq ósim 50 protsenttik deńgeide qalyp otyr. Kiikterdi aýlaýǵa 2023 jylǵa deiin zań júzinde shekteý qoiyldy.
