Qostanai oblysynda koronavirýstyq infektsiiaǵa qarsy vaktsinalaý boiynsha daiyndyq jumystary aiaqtaldy, dep habarlaidy "Ult aqparat" oblystyq densaýlyq saqtaý basqarmasynyń baspasóz qyzmetine silteme jasap.
Oblystyq densaýlyq saqtaý basqarmasynyń dári-dármek saiasaty bóliminiń basshysy Gúlnar Ospanovanyń aitýynsha, búgin aimaqqa vaktsinanyń 1200 dozasy ákelindi. Vaktsina júrgizýge barlyǵy 31 meditsinalyq mekeme jumyldyrylady. Onyń ishinde 26 memlekettik, 5 jekemenshik emhana bar.
«Vaktsina temperatýralyq rejimdi saqtai otyryp jetkizildi. Endi vaktsinanyń oblystyń barlyq emhanalary alady. Vaktsinatsiia tegin jáne erikti túrde ótedi. Eger bul naýqanǵa qatysqyńyz kelmese, jazbasha túrde bas tartasyz. 18 jasqa deiingi balalar men 65 jastan asqan adamdar egilmeidi. Naýryz aiynda egý protsesinen muǵalimder ótedi», - deidi G.Ospanova.
Búgin dárigerler men sanepidbaqylaý departamentiniń qyzmetkerleri vaktsina qabyldamaq.
Qostanai qalasynan shalǵai aýyldarǵa vaktsina tasymaldaityn avtorefrijerator jáne sýyq saqtaǵysh qabileti bar 100 termokonteiner satyp alyndy.
Aita keteiik, búgin Qazaqstanda koronavirýs infektsiiasyn juqtyrý jáne taratý táýekeli joǵary sanattardy koronavirýsqa qarsy vaktsinalaý bastaldy. Qazaqstanda vaktsina erikti túrde salynady.
