Qazirge deiin Qostanai oblysynda 40 adam vaktsinalaýdan ótti, dep habarlaidy QazAqparat.
Oblystyq densaýlyq saqtaý basqarmasynyń baspasóz qyzmeti málim etkendei, búgin saǵat 16:00-degi jaǵdai boiynsha óńirde 40 adam koronavirýs indetine qarsy ekpeden ótti. Olardyń teń jartysy – meditsina qyzmetkerleri.
«Egilgenderdiń arasynda oblys ákiminiń orynbasary Erlan Spanov, Qostanai oblysynyń memlekettik sanitarlyq bas dárigeri Ermuhanbet Dáýletbaev, Densaýlyq saqtaý basqarmasy basshysynyń orynbasary Rústem Aitbaev jáne oblystyq jedel járdem qyzmetiniń bas dárigeri Irina Shteigervald bar. Patsientter vaktsinatsiiadan keiin jarty saǵat mamandardyń baqylaýynda arnaiy kabinette bolady. Egý protsesinen buryn patsientti terapevt tekserip, kelisimin alady», - deidi vedomstvonyń baspasóz hatshysy Kseniia Jilkibaeva.
Buǵan deiin Qostanai oblysynda koronavirýstyq infektsiiaǵa qarsy vaktsinalaý boiynsha daiyndyq jumystary aiaqtalǵanyn jazdyq.
Oblystyq densaýlyq saqtaý basqarmasynyń dári-dármek saiasaty bóliminiń basshysy Gúlnar Ospanovanyń aitýynsha, búgin aimaqqa vaktsinanyń 1200 dozasy ákelindi. Vaktsina júrgizýge barlyǵy 31 meditsinalyq mekeme jumyldyrylady. Onyń ishinde 26 memlekettik, 5 jekemenshik emhana bar.
