Qostanai ákimdiginiń turǵyn úi-kommýnaldyq sharýashylyq bólimi Karbyshev kóshesindegi jaiaý júrginshilerge arnalǵan joldy jóndeý jumystary júrgizilip jatqan videoǵa qatysty túsinikteme berdi, dep habarlaidy Sputnik Qazaqstan.
Qala turǵyndary jol jóndeý jumystary kún sýyǵanda júrgizilgenine áne jaýapty tulǵalar jumys sapasyn qadaǵalamaǵanyna narazy boldy.
"Bastysy – aqshany igerý. Jap-jaqsy trotýar edi", - dep shamdandy qostanailyqtar.
Osyǵan bailanysty turǵyn úi-kommýnaldyq sharýashylyq bólimi tehnologiiany buza otyryp oryndalǵan jumysty merdigerden qabyldamaimyz dep ýáde berdi.
"Qostanai qalasy ákimdiginiń turǵyn úi-kommýnaldyq sharýashylyq bólimi men "Jańa ómir 2012" JShS arasynda 292 million teńgege jaiaý júrginshiler jolyn jóndeý boiynsha kelisimshart jasaldy. Kelisimshartqa sáikes merdiger 2022 jyldyń 31 qazanyna deiin aýdany 33 500 sharshy metrdi quraityn jaiaý júrginshiler jolyna tas tóseý jumystaryn oryndaýy kerek bolatyn", - dedi ákimdiktegiler.
Biraq, búgingi kúni merdiger atqarǵan jáne turǵyn úi-kommýnaldyq sharýashylyǵy bólimimen qabyldanǵan jumys kólemi jalpy kólemniń 70%-in qurap otyr. Atqarylǵan jumystar úshin JShS-ǵa 144,7 million teńge aýdaryldy.
"Kelisimshartta kózdelgen jumystar merzimge sai oryndalmady. Qurylys-montajdaý jumystary qolaisyz aýa raiy jaǵdaiynda tehnologiiany buzyp jasaldy. Aiazdy temperatýrada ylǵaldy qumdy paidalaný arqyly júrgizilip jatqanyn eskere otyryp, talapqa sai emes oryndalǵan jumystar qabyldanbaidy", - dep sendirdi ákimdiktegiler.
Sondai-aq, turǵyn úi-kommýnaldyq sharýashylyq bóliminde qurylys-montajdaý jumystaryn sapasyz júrgizgeni, jumystardyń bekitilgen jumys kestesinen keshiktirilgen úshin merdigerge birneshe ret shaǵym joldanǵanyn habarlady.
Qazir "Jańa Ómir 2012" JShS-ny josyqsyz jabdyqtaýshylar tizimine engizý týraly sotqa talaparyz daiyndalyp jatyr.
