38 jastaǵy Vosa Osmani Kosovo prezidenti bolyp sailandy. Oǵan 120 depýtattyń 71-i qoldap daýys berdi. Byltyr qarasha aiynda Gaaga soty memleket basshysy Hashim Tachidi áskeri qylmys jasady dep aiyptaǵannan keiin Osmani prezident mindetin ýaqytsha moinyna alǵan.
Kosovonyń oppozitsiialyq partiialary jáne quqyq qorǵaýshylar Kosovo demokratiialyq ligasy (liberal-konservator) atynan bir mezgilde premer-ministr jáne parlament spikeri bolǵan Vosa Osmanidiń prezident retinde taǵaiyndalýyn synady. Olar bul Kosovodaǵy onsyz da názik demokratiialyq júieni alǵa jyljytpaidy dep sanaidy.
Reuters agenttiginiń jazýynsha, jańa prezident batys qundylyqtarymen jaqsy tanys jáne tamyr-tanystyqty, nepotizmdi qoldamaidy, buǵan qosa dástúrli saiasi partiialardyń tiimsiz jumys isteitindigin moiyndaidy.
Prezident qyzmetine kirisken Osmani alǵashqy úndeýinde Serbiiamen dialogty jandandyrýǵa shaqyrdy. Buǵan qosa, Belgrad 1998-99 jylǵy qaqtyǵys kezindegi áskeri qylmysqa jaýapty tulǵalardy sotqa tartyp, Kosovo turǵyndarynan keshirim suraýy tiis dep málimdedi. Reuters-tiń jazýynsha, sol soǵystyń saldarynan Kosovo 2008 jyly Serbiiadan táýelsizdigin jariialady.
Kosovo respýblikasy – táýelsiz memleket retinde jartylai moiyndalǵan Ońtústik-Shyǵys Eýropa men Balqan túbegindegi shamamen 2 mln halqy bar memleket. Ony 193 memlekettiń 98-i moiyndaǵan.
