Foto: pexels.com
Astanada ótken 5-shi Dúniejúzilik kóshpendiler oiyndary ulttyq sport túrlerin ulyqtap, Uly dalanyń mádeni bai murasyn kórsetti. Sheteldik meimandar sporttyq jarystardan bólek, qazaqtyń dástúrli taǵamdaryna da erekshe tánti boldy. Osylaisha Sport jáne týrizm ministrligi otandyq týroperatorlardyń saýalnamasy negizinde oiyndarǵa kelgen qonaqtardyń esinde qalǵan bes ulttyq taǵamdy usyndy, dep habarlaidy Ult.kz.
1. Besbarmaq
Úzdik bestiktiń kóshbasshysy, árine – besbarmaq (ár óńirde ártúrli aitylady). Bul dástúrli taǵam qainatylǵan et pen úlken tórtburyshty qamyrdan (jaima/shelpek) jasalady. Tamaqtyń negizgi quramyna tórt túlik maldyń – qoi, siyr, jylqy jáne túie eti kiredi. Ásirese, jylqy eti (qazy, shujyq, jal, jaia) merekelik dastarhannyń sánin keltiredi. Sheteldik qonaqtar bul taǵamnyń til úiiretin dámin erekshe baǵalady.
2. Baýyrsaq
Ekinshi orynda – baýyrsaq. Bul taǵam ár qazaq dastarhanynda mindetti túrde bolady. Sheteldik qonaqtar qamyrdan jasalyp, maida qýyrylǵan altyn tústes jumsaq taǵamnyń erekshe dámine tánti boldy. Ásirese, sheteldik meimandar shi baýyrsaqty kádesyi retinde kóptep satyp aldy.
3. Qymyz
Úshinshi orynda – qymyz. Bie sútinen ashytylyp daiyndalǵan bul sýsynnyń qyshqyltym dámi men emdik qasietteri týristerdiń erekshe qyzyǵýshylyǵyn týdyrdy.
4. Qurt
Tórtinshi orynda – qurt. Sút ónimine jatatyn qurttyń tuzdy dámi sheteldik qonaqtarǵa qatty unady.
5. Shubat
Úzdik bestikti shubat túiindedi. Bul – túie sútinen jasalǵan qoiý sýsyn. Shubat – túie sharýashylyǵy keń damyǵan Qazaqstannyń batys jáne ońtústik óńirlerinde keńinen tanymal.
"Elimizdiń ulttyq taǵamdary – tek tamaq qana emes, ótken men búgindi bailanystyratyn mádeni kópir. Gastronomiialyq týrlar sheteldik týristerdiń Qazaqstanǵa jasaǵan saparlarynyń mańyzdy bóligine ainaldy", – dedi Qazaqstan Respýblikasy Týrizm jáne sport ministrligi Týrizm indýstriiasy komitetiniń resmi ókili Aijan Joldasbekova.
