Qazaqstan Respýblikasynyń Memlekettik hatshysy Qyrymbek Kósherbaev QR Prezidenti janyndaǵy Sybailas jemqorlyqqa qarsy is-qimyl máseleleri jónindegi komissiianyń otyrysyn ótkizdi, dep habarlaidy "Ult aqparat" Aqordaǵa silteme jasap.
Komissiianyń kezekti otyrysy beinekonferentsiia bailanysy rejiminde ótti. Onda Jumyspen qamtýdyń 2020-2021 jyldarǵa arnalǵan Jol kartasynyń tiimdiligi jáne basshylardyń baǵynysyndaǵy qyzmetkerlerdiń sybailas jemqorlyqqa tartylǵany úshin tártiptik jaýaptylyǵy men otstavka institýtyn quqyqtyq qoldanýdyń ózekti máseleleri qaraldy.
Atalǵan máseleler boiynsha atqaralyp jatqan jumystar týraly Respýblikalyq biýdjettiń atqarylýyn baqylaý jónindegi esep komiteti, Bas prokýratýra, Sybailas jemqorlyqqa qarsy is-qimyl, Memlekettik qyzmet isteri agenttikteri, Qarjy, Eńbek jáne halyqty áleýmettik qorǵaý ministrlikteri basshylyǵynyń, birqatar óńir ákimderiniń baiandamalary tyńdaldy.
Birinshi máseleni qaraý barysynda halyqty qosymsha tabys kózderimen qamtamasyz etý maqsatynda ázirlengen, daǵdarysqa qarsy basty sharalardyń biri bolyp tabylatyn Jol kartasyn iske asyrýdyń mańyzdylyǵy atap ótildi.
Jol kartasynyń negizinde mańyzdy infraqurylymdyq jobalardy iske asyrý bastaldy. Oǵan ótken jyly 1 trln. teńge bólindi. Al biyl shamamen 325 mlrd. teńge bólý josparlanǵan.
Bul rette osy baǵdarlamalyq qujattyń mańyzdylyǵyn jáne qarjylandyrý kólemin eskere otyryp, Memleket basshysy biýdjet qarajatynyń maqsatty jáne tiimdi jumsalýyn baqylaýdy tapsyrǵan bolatyn.
Quqyq qorǵaý jáne baqylaýshy memlekettik organdar júrgizgen tekserýler uiymdastyrýshylyq sipattaǵy jáne qarjylyq tártiptiń saqtalmaitynyn anyqtady. Sondai-aq azamattardyń turaqty jumys oryndaryn ashý kezindegi is-áreketin, ásirese, adamdardy jumysqa jalǵan ornalastyrý máselesin qatań baqylaý qajettigin aiqyndady.
Máselen, ótken jyldyń ózinde ǵana Esep komiteti quqyq qorǵaý organdaryna 72 fakt boiynsha material bergen. Al 339 fakti boiynsha kináli tulǵalardyń ákimshilik jaýaptylyǵy týraly másele kóterilgen.
Sybailas jemqorlyqqa qarsy agenttik 28 qylmystyq quqyq buzýshylyqty tirkegen. Ol boiynsha 23 adam jaýapkershilikke tartylǵan. Prokýratýra organdary bolsa, 331 qadaǵalaý aktisin engizdi, 493 adam tártiptik jaýapkershilikke, 540 adam ákimshilik jaýapkershilikke tartyldy.
Osyǵan bailanysty, tiisti memlekettik organdarǵa bólingen qarjynyń jumsalý zańdylyǵy men tiimdiligine monitoringti jalǵastyrý, Jol kartasyn iske asyrý jumysyn tiisti úilestirýdi qamtamasyz etý, qarjy tártibin saqtaý jáne merdiger uiymdardyń jańa jumys oryndaryn ashý kezindegi mindettemelerin oryndaýyn baqylaýda ustaý usynyldy.
Ekinshi másele aiasynda sybailas jemqorlyqqa qarsy aldyn alý sharalaryn qabyldamaǵany jáne sybailas jemqorlyq quqyq buzýshylyqtar jasaǵany úshin memlekettik organdar basshylarynyń jaýapkershiligin arttyrý institýtynyń tiimdiligi qaraldy.
Bul institýtty engizý qajettiligin Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaev pen Memleket basshysy Qasym-Jomart Kemeluly Toqaev birneshe ret atap ótken edi.
Memlekettik qyzmet isteri agenttiginiń málimetinshe, qaramaǵyndaǵy qyzmetkerlerdiń sybailas jemqorlyq qylmystary úshin 108 memlekettik qyzmetshi men qyzmetker tártiptik jaýapkershilikke tartylǵan. Onyń 15-i otstavkaǵa ketken, al 93 tulǵaǵa túrli tártiptik jaýapkershilik júktelgen.
Tutastai alǵanda, sybailas jemqorlyqtyń aldyn alý jónindegi is-sharalarǵa bailanysty basshylardyń tikelei tartylýyn talqylaý nátijeleri jańa zańnamalardyń nátijeli iske asyrylyp jatqanyn jáne alǵa ilgerileý bar ekenin kórsetti.
Sonymen qatar atalǵan jańa ózgeristerdi júzege asyrý kezeńinde atalǵan baǵyttaǵy sybailas jemqorlyqqa qarsy zańnamany odan ári jetildirý qajettiligi aiqyndaldy.
Osy máselelerdi eskere otyryp, ýákiletti memlekettik organdarǵa tiisti usynystardy odan ári pysyqtaýdy jáne iske asyrýdy júzege asyrý usynyldy.
Otyrys qorytyndysy boiynsha Qazaqstan Respýblikasynyń Memlekettik hatshysy Qyrymbek Kósherbaev qaralǵan máseleler boiynsha naqty tapsyrmalar berdi, olardyń oryndalýy baqylaýǵa alyndy.
