Saiasi qýǵyn-súrgin qurbandaryn tolyq aqtaý jónindegi memlekettik komissiianyń maqsaty – ornyqty sheshim qabyldap, tarihi ádilettilikti qalpyna keltirý jolyndaǵy joǵary kásibilik pen ádildikke qaltqysyz qyzmet etý.
Memlekettik komissiianyń alǵashqy otyrysynda QR Memlekettik hatshysy Qyrymbek Kósherbaev osylai dedi, dep habarlaidy QazAqparat.
«Ózderińiz belgili, Táýelsizdiktiń alǵashqy araily tańynan bastap biz óz tarihymyzǵa jańasha qarap, eldiń ótkenin zerdelep, elekten ótkizýge bet buryp kelemiz. Sol jaýapty iste Elbasy Nursultan Ábishuly Nazarbaevtyń tikelei bastamasymen 1993 jylǵy sáýirde qabyldanǵan saiasi qýǵyn-súrgin qurbandaryn jappai aqtaý týraly QR zańy yqpaldy normativti tetikke ainaldy. Jaqynda jazyqsyz aiyptalǵandardy aqtaýdyń jańa kezeńiniń quqyqtyq qujaty qabyldanyp, Memleket basshysy Qasym-Jomart Kemeluly Toqaevtyń saiasi qýǵyn-súrgin qurbandaryn tolyq aqtaý jónindegi memlekettik komissiia týraly Jarlyǵy jaryqqa shyqty. Endigi jerde aldymyzda asa aýqymdy mindetter, kúrmeýi sheshýdi qajet etetin kúrdeli tarihi máseleler tur», - dedi Qyrymbek Kósherbaev memlekettik komissiianyń otyrysynda.
Memlekettik hatshy osy rette bul iske komissiia múshelerin barynsha baiyppen qaraýdy surady.
«Memlekettik komissiia emotsiiaǵa berilip, daý-damaiǵa jol beretin diskýssiia alańy emes. Bizdiń maqsatymyz – ornyqty sheshim qabyldap, tarihi ádilettilikti qalpyna keltirý jolyndaǵy joǵary kásibilik pen ádildikke qaltqysyz qyzmet etý ekenin esterińizge salamyn», - dedi Memlekettik hatshysy.
Qyrymbek Kósherbaev Memleket basshysy Qasym-Jomart Toqaevtyń biyl saiasi qýǵyn-súrgin jáne asharshylyq qurbandaryn eske alý kúnine orai jasaǵan úndeýinde HH ǵasyrdyń 20-50 jyldaryndaǵy saiasi qýǵyn-súrgin zobalańy halqymyzdyń tarihyndaǵy qasiretti kezeń ekenin atap ótip, tarihi ádildikti qalpyna keltirý jumystaryn aiaqtap, saiasi qýǵyn-súrgin qurbandaryn aqtaý úshin arnaiy memlekettik komissiia qurýdy tapsyrǵanyn eske saldy.
«Mine, atalǵan tarihi missiiany atqarý mindeti osynda otyrǵan barshamyzǵa júktelip otyr. Bul mindetti biz jazyqsyz japa shekkenderdiń rýhyna taǵzym etý úshin jáne jas urpaqty jańa jasampaz sanamen tárbieleý úshin oryndaýymyz qajet. Álbette, sol zamandaǵy solaqai saiasattyń saldarynan bolǵan saiasi qýǵyn-súrginniń zardaptaryn Keńes Odaǵyndaǵy barsha halyqtardyń tartqany aqiqat. Desek te óziniń taǵdyr-talaiynda myń ólip, myń tirilgen halqymyzdyń HH ǵasyrdyń alǵashqy jartysynda kórgen azaby men qasiretin sózben aityp jetkizý qiyn ekeni belgili. Ótken júzjyldyqdyń 20-30 jyldaryndaǵy kúshtep ujymdastyrý, tárkileý ultymyzdyń ǵasyrlar boiy ornyqqan ómir saltyn buzý áreketteri qazaq halqynyń qynadai qyrylýyna ákep soqtyrǵany ashy shyndyq. Sondai soraqy áreketterge shydamai, azamattyq quqyǵyn talap etip atqa qonǵan qazaqtardyń 372-ge jýyq bas kóterýine de buryndary bir jaqty baǵa berilgeni belgili. Ultymyzdy órkeniet kóshine qosýǵa umtylǵan Alash arystaryn qýǵynǵa túsirgen 1937 jyldyń saiasi naýqany jurtshylyqtyń áli de jadynda tur», - dedi Qyrymbek Kósherbaev.
