Aqordada QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótti, dep habarlaidy QazAqparat.
Qazaqstan Respýblikasynyń Memlekettik hatshysy Qyrymbek Kósherbaevtyń tóraǵalyǵymen ótken jiynda 2019 jyly baǵdarlamany iske asyrýdyń nátijeleri men alda atqarylatyn jumystyń jańa basym baǵyttary qaraldy.
«Ózderińizge belgili, Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń bastamasymen «Rýhani jańǵyrý» baǵdarlamasyn iske asyrylyp jatqanyna biyl úsh jyl tolady. Úsh jylǵa jýyq ýaqytta eleýli jumystar atqarylyp, naqty jobalar júzege asyryldy. Sonymen birge Memleket basshysy Qasym-Jomart Kemeluly Toqaevtyń jaqynda jaryq kórgen «Abai jáne HHI ǵasyrdaǵy Qazaqstan» maqalasyndaǵy oishyldyń eńbekteri arqyly taralǵan rýhani baǵyttary osy baǵdarlamamen tabiǵi sabaqtastyq taýyp otyrǵanyn qoǵamdyq pikir qoldap otyr», - dedi Qyrymbek Kósherbaev otyrys barysynda.
Memlekettik hatshy óz sózinde «Rýhani jańǵyrý» baǵdarlamasy óziniń ólshemderi boiynsha naqty jobalardy iske asyrýǵa baǵyttalǵan keshendi baǵdarlama ekenin atap ótti.
«Sonyń nátijesinde búgin de baǵdarlama zamanaýi qazaqstandyq mádeniet, ozyq bilim, ǵylymi zertteý, arheologiia jáne basqa da túrli baǵyttardyń damýyna edáýir serpilis berýde. Qazirgi tańda 6 baǵyt boiynsha 13 arnaiy joba iske asyrylýda. Jasyratyny joq birqatar joba nátijeli júrgizilse, keibiri kózdegen mejeden shyǵa almai otyr. «Týǵan jer» jobasy aiasynda metsenattardyń arqasynda demeýshilik qarajat esebinen 2019 jyly 60 mlrd teńgege jýyq qarajat tartyldy. Onyń ishinde 889 nysan jańadan salyndy. 631 nysan kúrdeli jóndeýden ótti. Atap ótý kerek, qarjylandyrýdyń eń kóp kólemi Mańǵystaý, Almaty, Atyraý, Qyzylorda jáne Aqmola oblystarynyń úlesinde. Bul kórsetkishter Qazaqstandaǵy biznes ókilderdiń áleýmettik jaýapkershiligin kórsetetein baiqatady», - dedi ol.
Qyrymbek Kósherbaev sonymen qatar «Aýyl – el besigi» jobasy boiynsha aldaǵy úsh jyldaǵy is-sharalardy iske asyrýǵa Úkimet respýblikalyq biýdjetten 90 mlrd teńge qarastyrylǵanyn aitty. Onyń ishinde 2019 jyly 30 mlrd teńge bólinip, 711 jobadan turatyn 53 aýyldyq eldimekende 452 infraqurylymdyq joba iske asyryldy.
«Qalǵan jobalar elimizdiń rýhaniiaty men tarihyn, ádebieti men mádenietin, bilimi men ǵylymyn tereńdetý, tanytý, zertteý baǵyttary boiynsha jalǵasýda», - dedi Memlekettik hatshy.
