QR Memlekettik hatshysy, qoǵam qairatkeri Qyrymbek Kósherbaev ǵalamdyq indetten keiingi memlekettiń aldynda turǵan maqsat-mindetter týraly pikir bildirdi, dep habarlaidy "Ult aqparat".
«Ǵalamdyq indetke bailanysty aitar bolsam, jaqynda Memleket basshysy Qasym-Jomart Toqaev maýsym aiynda «Ana tili» gazetine «Qazaq halqynyń taǵdyry tarih tarazysynda tur» atty maqala jariialady. Onda Memleket basshysy kóptegen kókeitesti máselege bailanysty óziniń oi-pikirin aitty. Indetke qatysty, ony jeńip shyǵýdyń qandai joldary bary týraly sóz qozǵaldy. Eldiń birligi men yntymaǵynyń arqasynda «myń ólip, myń tirilgen» qazaq halqy bul qiyndyqtan da aman shyǵatynyna esh kúmán joq. Biraq bir aqiqat bar. Bul ǵalamdyq indet pen áleýmettik-ekonomikalyq daǵdarystan keiin dúnie burynǵydai bolmaidy. Bizdi úlken órkeniettik ózgerister kútip tur. Sondyqtan biz oǵan daiyn bolýymyz kerek. Sondyqtan biz ziialy qaýymmen birlesip, úlken rýhani izdenisterdiń aldynda turmyz. Sol suraqtardyń jaýabyn birge aiqyndaýymyz kerek», - dedi «Abai TV» arnasyna bergen suhbatynda.
Memlekettik hatshynyń aitýynsha, zamannyń jańa tegeýrinderine laiyqty jaýap berý kerek. Sonymen qatar Qyrymbek Kósherbaev «Rýhani jańǵyrý» baǵdarlamasynyń júzege asyrylý barysy qai kezeńde turǵanyn aityp ótti.
«Rýhani jańǵyrý» baǵdarlamasynyń jańa tynysy ashylýy kerek dep esepteimiz. Sebebi zaman ózgerip jatyr. Osy ýaqytqa deiin bul baǵytta kóptegen jumys atqaryldy. Biraq qazir jańa zamannyń kelbetine sai jańa rýhani jobalar qajet. Sondyqtan osy múmkindikti paidalana otyra, ziialy qaýymnan ótinerimiz, bilikpen birge ziialy qaýym rýhani jobalardy júzege asyrýy kerek. Bizge básekege qabiletti tolyqqandy adam qajet. Masyldyqqa oryn joq. Daǵdarysqa jańa múmkindikter men jetistikterdiń bastaýy dep qaraýymyz kerek», - deidi Qyrymbek Kósherbaev.
Memlekettik hatshy bul rette japon halqynyń 1945 jylǵy tarihyn eske aldy. Onyń aitýynsha, 1945 jyly 15 tamyzda Japoniia imperatory Hirohito Kioto qalasynda sóz sóilegen.
«Japoniiada imperatordy kúnniń sáýlesinen jaralǵan adam dep esepteidi. Imperatordyń aitqan sózi jurtty biriktirip, uiystyrady. Tártip boiynsha japondyqtar imperator sóilegende tizerlep turyp, tyńdaidy eken. Bul joly Hirohito «Halyqtyń bári túregep tursyn, al imperatordyń ózi tizerlep turyp eliniń aldynan keshirim suraidy» dep úndeý jariialaidy. Óitkeni japon armiiasy tas-talqan bolyp, AQSh Hirosima men Nagasaki qalalaryna atom bombasyn tastady. Sol sózinde Hirohito «jan tózbes qiyndyqqa shydaiyq, emotsiiaǵa jol bermei, nyǵaiyp, birigip, eńbek eteiik» degen sózdi aitady. Imperator memleketti qutqarýdyń birden-bir joly – adamdy damytý deidi. Al qazir Japoniia álemdegi tehnologiiasy joǵary damyǵan bes memlekettiń qatarynda. Solai bola tura ózderiniń ulttyq dástúrin qalai saqtap qalǵanyn bilesiz. Sondyqtan japondyqtardyń kórsetken joly – bizge úlgi», - degen Memlekettik hatshy kezinde Alash qairatkerleriniń de erligine japon halqynyń jetistigi rýh bergenin eske aldy.
Qyrymbek Kósherbaev tsifrlyq tehnologiialar, jasandy intellekt zamany kezinde ulttyq qundylyqtardan aiyrylyp qalmai, rýhani qundylyqtardy baiyta otyryp, órkeniettiń jańa talaptaryna sai ómir súre bilýi kerektigin aitty.
