Baitaq elimizdiń bolashaǵyn baiandy etýge qaltqysyz qyzmet etý - árbir azamattyń ortaq paryzy. Bul týraly «Qoǵam jáne memleket: «Birgemiz» - 30 jyldyq seriktestik pen damý» atty IX Azamattyq forýmnyń jalpy otyrysynda QR Memlekettik hatshysy Qyrymbek Kósherbaev aitty, dep habarlaidy QazAqparat.
«Baitaq elimizdiń bolashaǵyn baiandy etýge qaltqysyz qyzmet etý - árbir azamattyń ortaq paryzy, Otanymyzdyń aldyndaǵy asyl boryshy. Árine kez kelgen memleket óziniń damý jolynda barsha azamattyń qabileti men qarymyna, áleýeti men adaldyǵyna mán berip, azamattyq qoǵamdy uiymdastyrýǵa baǵyttalǵan baiypty saiasat júrgizgende ǵana oń nátijege qol jetkizetindigi belgili. Bul oraida Táýelsizdik jyldarynda elimizde azamattyq qoǵamnyń ornyǵýyna Elbasy Nursultan Nazarbaev ólsheýsiz eńbek sińirse, Memleket basshysy Qasym-Jomart Toqaev osy igilikti joldy jalǵastyryp, úkimettik emes uiymdardyń belsendi qyzmet atqarýyna jol ashyp otyr», - dedi Memlekettik hatshy.
Osy rette ol memleket degen uǵymnyń ózi taǵdyry men talaiy, múddesi men múmkindigi toǵysqan azamattardyń toptasýynan quralyp, birtutas el qurýǵa umtylǵan ulttyq qurylym ekendigin atap ótti.
«Sondyqtan biz azamattyń, qoǵamnyń jáne memlekettiń ózara úilesimdi jáne óreli úndestikte ómir súrýine meilinshe múmkindik berýimiz kerek. Biz qoǵam men memlekettiń arasyna ala jip tartyp, azamat pen memleketti arazdastyrýdy maqsat tutatyn bázbir qaǵidalarǵa múldem qarsymyz», - dedi Qyrymbek Kósherbaev.
.jpeg)